Një zyrtar i Forcave Kufitare në Dover, Britaninë e Madhe është arrestuar pasi akuzohet për shkeljen e ligjit të emigracionit dhe cilësohet si emigrant i paligjshëm.
Sipas “TheSun”, zyrtari i cili dyshohet se është shqiptar u arrestua me dyshimin për shkelje të imigracionit ndërsa punonte për agjencinë Home Office përgjegjëse për sigurimin e perimetrit të vendit.
Shefat e Zyrës së Brendshme kanë pezulluar menjëherë punonjësin i cili mendohet të jetë në fund të të 30-ave. Ky punonjës mbërriti në Britaninë e Madhe rreth 20 vjet më parë si adoleshent nga Ballkani. Punonjësi akuzohet se ka gënjyer për vendin e tij të origjinës në dokumentet për të qëndruar në Mbretërinë e Bashkuar. Këtu përmendet fakti se qindra të rinj shqiptarë mbërritën në Britani duke pretenduar se ishin kosovarë për të fituar azil.
Burri më vonë fitoi të drejtën për të qëndruar dhe punuar në Mbretërinë e Bashkuar. Ai pasi kaloi kontrollet bazë të punësimit dhe të dosjeve kriminale, u punësua në Forcën Kufitare. Detyra e tij numër një ishte të “siguronte kufirin e Mbretërisë së Bashkuar” me fokusin kryesor në ndalimin e migracionit të paligjshëm në Britani.
“Shqiptari” është një nga katër punonjësit e Forcave Kufitare të arrestuar në një hetim të veçantë më 6 dhjetor. Ata u mbajtën nën dyshimin për sjellje të pahijshme në një zyrë publike dhe komplot për të vjedhur. Secili prej tyre ka punuar në vijën e parë të emigracionit në rolet e tyre përkatëse me Forcën Kufitare. Oficerët sekuestruan telefona celularë dhe laptopë të arrestuarve dhe kontrolluan shtëpitë e tyre.
