Shtetet e Bashkuara të Amerikës kanë nisur procedurat për të ngritur Byronë Kombëtare të Hetimit. Teksa KLP të hënën do zgjedhë anëtarët e parë të SPAK, amerikanët janë vënë në lëvizje për të bërë gati terrenin me qëllim shfarosjen e të korruptuarve. Zemra e SPAK do të jetë Byroja Kombëtare e Hetimit dhe ajo do të jetë e gjitha në dorë të amerikanëve. BKH do jetë policia gjyqësore e SPAK dhe do ketë në shënjestër vetëm pushtetarët e lartë.
Por dje SHBA ka dërguar një mesazh shumë të qartë për klasën politike të korruptuar, pasi ka hedhur hapin e parë për ngritjen e BKH. Ambasada e SHBA, përmes një postimi në rrjetet sociale bëri të ditur se kanë mbërritur në Tiranë disa pajisje poligrafi (makina e së vërtetës), të cilat do të ndihmojnë që hetuesit e BKH të jenë me integritet të lartë. Që nga kryetari dhe kushdo tjetër që do jetë në BKH do i nënshtrohet poligrafit në mënyrë që askush të mos mashtrojë për lidhje të ndryshme me krimin.
“Këtë javë, Byroja Kombëtare e Hetimit (BKH) hodhi një tjetër hap përpara drejt ngritjes së saj me dhurimin e pesë paketave të nga qeveria e Shteteve të Bashkuara për Ministrinë e Brendshme. Pajisjet do të përdoren nga poligrafë të trajnuar nga Shtetet e Bashkuara, të cilët do të kryejnë testimet e aplikantëve për Byronë Kombëtare të Hetimit, për të ndihmuar në ruajtjen e standardeve më të larta të integritetit.
Dhurimi dhe certifikimi i poligrafëve është pjesë e një programi dhjetë javor, financuar nga Byroja e Departamentit të Shtetit për Çështjet Ndërkombëtare të Zbatimit të Ligjit dhe Luftës ndaj Drogës nëpërmjet Programit Ndërkombëtar të Ndihmës për Trajnime në Hetimet Penale. Drejtori i Përgjithshëm dhe ekipi menaxhues i Shërbimit të Çështjeve të Brendshme dhe Ankesave, organizata që do të punësojë shqyrtuesit e poligrafeve, iu është bashkuar drejtuesit të programit ICITAP dhe drejtueses së INL në Shqipëri për ceremoninë e dorëzimit të pajisjeve”, shkruan ambasada.
Roli i FBI
Pajisja e poligrafit është e njëjtë me atë që përdoret nga FBI në SHBA. Në BKH do ketë një zyrë të posaçme për ndërkombëtarët dhe do të atashohet një agjent i FBI. Ai do të ndihmojë në përdorimin e poligrafit dhe kryerjen e trajnimeve për të goditur korrupsionin në nivele të larta. Ndërkohë edhe në ligj është e përcaktuar qartë roli që ka poligrafi në integritetin e përfaqësuesve të BKH. Në nenin 34, ku listohen kriteret që zyrtarët duhet të plotësojnë për tu bërë pjesë e BKH, theksohet se kandidatët duhet ti nënshtrohen testit të poligrafit. “ Të japë pëlqimin për t’iu nënshtruar testit të poligrafit. Informacioni në raportin e përgatitur nga specialisti i poligrafit mbahet në konsideratë gjatë procesit të përzgjedhjes”, shkruhet në ligj.
Sipas përcaktimeve në ligj, çdo person që ka kaluar testet dhe kushtet për të qenë anëtar i Byrosë, i nënshtrohet një regjimi rigoroz trajnimi dhe arsimimi, me një sërë modulesh vlerësimi që duhen kaluar përpara se të certifikohet. Pasi është certifikuar si i trajnuar dhe i aftë, kandidati konsiderohet hetues. Po ashtu çdo dy vjet hetuesit do kalojnë në testim dhe kush ngel, largohet nga detyra. Pra, kjo do të thotë se Byroja e Hetimit do jetë mjaft e përgatitur dhe rol shumë të madh do kenë të huajt. Dje SHBA ja u ka bërë të artë të gjithëve s etani nuk ka më asnjë kthim pas dhe Byroja Kombëtare e Hetimit do jetë gati shumë shpejt. /Ornela Çelpica
