Boksi ka një yll të padiskutuar në peshat e mesme, një kampion që s’njeh humbje dhe i rrëzon kundërshtarët në ring në pak raunde. Është Gennady Golovkin, i cili konfirmohet kampion për peshat e mesme në boks. 36-vjeçari nga Kazakistani mposhti me “knock-out” në raundin e dytë amerikanin me origjinë armene Vanes Martirosyan, i cili u zgjodh të duelonte me Golovkin pas pezullimit të Canelo Alvarezit për përdorim të substancave të ndaluara. Në ringun e “Carson”-it, pranë Los Anxhelesit, u zhvillua një duel pa histori, pasi Golovkin (38 fitore dhe 1 barazim) u shfaq superior ndaj rivalit të tij në në ring, duke e hedhur shumë shpejt në tapet.
Pas një raundi të parë pa shumë ritëm dhe emocione, ku Martirosyan u duk se ishte përgatitur mirë, Golovkin u shfaq i papërballueshëm, duke mbyllur llogaritë në raundine dytë. Një e djathtë e fortë e çorienton rivalin, që nuk arrin të reagojë dhe pas disa goditjeve radhazi të kazakut përfundon në tapet, duke mos u ngritur më edhe pse gjyqtari numëron deri në 10. Për Martirosyan kjo është humbja e katërt në karrierë (ka edhe 36 fitore e 1 barazim). Golovkin, me këtë sukses mbron titujt kampion në WBA, WBC dhe IBF. Asnjë rival për momentin nuk duket në lartësinë e duhur për t’u përballur me kazakun kampion absolut në peshat e mesme. /Pamfleti Sport
