Juristi Kreshnik Spahiu ka deklaruar se PD duhet t’i tregojë popullit arsyet se përse Shtetet e Bashkuara të Amerikës dhe Anglia nuk po i heqin non gratën Sali Berishës, pas një investimi dhe lobimi gati një-vjeçar për këtë gjë.
Në emisionin ‘Frontline’ me gazetaren Marsela Karapanço në Report TV, Spahiu tha se SHBA-të i kanë hequr non gratën Presidentit të Rusisë, Vladimir Putinit dhe liderit të Republikës Sërpska, Millorad Dodik, por Berishën ende nuk e kanë hequr nga lista e zezë.
“Kjo parti e cila pretendon të vijë në pushtet, a e ka luksin sot që mos t’i tregojë shqiptarëve që kandidati për kryeministër që u investua një vit rresht, për forcimin e marrëdhënieve me SHBA-të, pas një viti investimi SHBA-të dhe Anglia nuk ia heqin statusin ‘non grata’. Ja kanë hequr Vladimir Putinit, ja kanë hequr Dodikut dhe Sali Berishës nuk ia heqin. Kaq detyrim PD ka për t’ja thënë publikut dhe elektoratit se kush është arsyeja që pas një viti është dështuar në tratativat dhe investimet për të vizituar SHBA-në, për të hequr statusin non grata. Kjo tregon se ka arsye shumë të thella se edhe administrata Trump, në vazhdim të administratës Biden nuk paska qenë e shitur nga Soros, por janë arsye më të thella strategjike politike që këtë person e lënë non grata”, tha mes të tjerash Spahiu.
