Zlatan Ibrahimovic po kalon një periudhë të vështirë jashtë fushës së blertë, teksa kritikat ndaj tij vazhdojnë të shtohen si për rolin e tij te Milani, ashtu edhe për parqitjet si komentator televiziv gjatë Botërorit 2026.
Ish-sulmuesi suedez është vënë shpesh në shënjestër nga tifozët e Milanit për mënyrën se si është menaxhuar klubi në vitet e fundit. Situata është bërë edhe më e ndërlikuar javët e fundit, mes paqartësive në strukturën drejtuese dhe refuzimeve të ndryshme nga trajnerë e drejtues klubesh që janë përfolur për t’iu bashkuar kuqezinjve.
Pakënaqësia e tifozëve është rritur edhe më shumë pas vendimit të Ibrahimovic për të udhëtuar në Shtetet e Bashkuara të Amerikës, ku po angazhohet si komentator për Fox Sports, në një moment që konsiderohet delikat për Milanin.
LEXO EDHE:
Meksika fiton 1-0 kundër Koresë së Jugut dhe bëhet skuadra e parë që kualifikohet në raundin e 1/16-ave të Botërorit
Megjithatë, eksperienca e tij televizive nuk po shoqërohet me reagime pozitive. Gazeta britanike “The Times” ka publikuar kritika të forta ndaj stilit të tij në transmetim. Editorialisti Andrew Marchand shkroi se “me më pak Zlatan, programi do të ishte më i mirë”, duke argumentuar se suedezi nuk ka treguar njohuri të mjaftueshme për skuadrat dhe futbollistët pjesëmarrës në turne.
“Deri tani problemi me Zlatan është se duket sikur nuk di shumë gjëra specifike për skuadrat apo lojtarët. Kur Fox transmetoi historinë e Jesse Marsch para ndeshjes së Kanadasë, dukej sikur Zlatan nuk kishte dëgjuar kurrë për të”, shkroi Marchand.
Ndryshe nga Ibrahimovic, gazetari vlerësoi ish-sulmuesin francez Thierry Henry, për të cilin tha se ofron “analiza elegante dhe ndriçuese”.
Pavarësisht valës së kritikave, Ibrahimovic vazhdon të shfaqë vetëbesimin që e ka karakterizuar gjatë gjithë karrierës. Në një skeç të realizuar nga Fox Sports, suedezi iu nënshtrua “makinës së së vërtetës” dhe u pyet nëse një panel me katër Zlatan do të ishte më i mirë se ai me Rebecca Lowe, Thierry Henry dhe Alexi Lalas.
Pa u menduar gjatë, Ibrahimovic u përgjigj: “Po”. Madje, sipas skeçit, përgjigjja u “konfirmua” edhe nga makina e së vërtetës.
