Cilido qoftë emri i Prokurorit të Ri të Përgjithshëm, ai nuk do të ketë konsensusin e të gjitha palëve në Kuvend. Të paktën, kështu paralajmëroi kreu i PD Sali Berisha i cili i zeroi mundësitë që deputetët e tij të bashkojnë votat me maxhorancën për një emër konsensual.
Teksa doli nga SPAK në zbatim të masës detyrim paraqitje, i pandehur për aferën Partizani, Berisha kërkoi zgjerimin e kompetencave të Prokurorit të Përgjithshëm, duke përfshirë edhe hetimin e prokurorëve të posaçëm.
“Ne nuk marrim pjesë në përzgjedhje emrash. Pas aktit të tyre me Avokatin e Popullit, ne kemi ndërprerë çdo lloj bashkëpunimi në përzgjedhjen e emrave. Por mund të them që Prokurori i Përgjithshëm sot është institucioni më i zhveshur nga çdo kompetencë dhe kur dëgjoj ndonjëherë raportin e tij, ai flet sikur është drejtori i statistikave të policisë. Është një zhveshje e gabuar, e gabuar që i kanë bërë atij sepse ai është institucion kushtetues, është institucion kushtetues dhe ta lësh atë sa për disa statistika, kjo është një akt.
Mendoj se mund të rishqyrtohet si institucion për të korrigjuar disa gabime që janë bërë. Për shembull, këta këtu (SPAK), këta hetojnë veten e tyre. Nuk ndodh në botë kështu. Nuk ndodh në botë që një institucion për çështje penale, se hajde administrative po, por për çështje penale të hetojë veten e tij.
Atëherë është e domosdoshme që një institucion tjetër, natyrisht meqenëse këta janë institucion kushtetues, një institucion tjetër kushtetues të marrë një institucion tjetër kushtetues të marrë disa atribute në mënyrë që askush të mos ndjehet mbi ligjin. E të tjera, por në këtë formë siç e kanë krasitë komplet Prokurorinë e Përgjithshme, ai institucion nuk ka një rol që duhet të ketë.”, tha Berisha.
Nëse Kuvendi nuk e zgjedh Prokurorin e Përgjithshëm brenda 30 ditëve nga paraqitja e kandidatëve, emri i renditur i pari nga Këshilli i Lartë i Prokurorisë konsiderohet i emëruar automatikisht. Kjo procedurë u vendos nga reforma në drejtësi për të rritur pavarësinë e Prokurorisë dhe për të kufizuar ndikimin politik në emërimin e Prokurorit të Përgjithshëm.
Kandidatët në garë
Adnan Xholi
Rovena Zoto
Ylli Pjetërnikaj
Fatjona Memçaj
Ish-prokurorja Arta Marku
