Filip Çakuli, Zv.Drejtori Politik i Top Channel, komentoi në “Top Story” mbajtjen në paraburgim të kryebashkiakut të Tiranës, Erion Veliaj, duke vënë në pikëpyetje nëse në momentin e arrestimit ishin mbledhur provat e nevojshme ndaj tij.
Sipas Çakulit, arrestimi nuk duhet t’i paraprijë sigurimit të provave. Në argumentin e tij për nevojën e provave përpara arrestimit, Filip Çakuli solli në “Top Story” edhe shembullin e Al Capone.
Ai bëri një paralelizim me mënyrën se si vepruan autoritetet amerikane ndaj gangsterit të famshëm, duke theksuar se, pavarësisht mijëra përgjimeve që FBI kishte në dispozicion, sipas tij, arrestimi nuk u krye derisa u siguruan provat.
“Për Veliajn nuk janë mbledhur provat e duhura për ta futur në burg, janë mbledhur vetëm thashetheme publike. Një pjesë e prokurorëve kanë nxjerrë telefonata jo plotësisht të vërteta, dhe Prokuroria thotë: “Ja, populli e di që është fajtor”. Kur bëhet ky linçim publik i njerëzve që ne e kemi nga komunizmi, populli ka të drejtë të mendojë, por jo ta linçojë. Atë e zgjidh gjykata, por deri atëherë s’dihet nga faktet dhe jo nga fustanet e gruas, ai nuk është argument.
Në komunizëm këndohej kënga: “Sot nuk e mbaj dot gëzimin, do këndoj për Sigurimin”. Është arrestuar Erion Veliaj. E di ti që FBI-ja, për të arrestuar Al Caponen, kishte mijëra regjistrime, por nuk i çoi në gjykatë se nuk kishte prova. Duhet t’i çosh në burg kushtet që të funksionojë si kryetar bashkie. Atëherë bëjë një zyrë në burg, prokurori shef kabineti, gardianët këshilltarë”, tha Çakuli.