Juristi i njohur, Kreshnik Spahiu ka nxjerrë në dritë detaje të reja tronditëse rreth vrasjes së Azem Hajdarit në shtator të vitit 1998, ngjarje që çoi në një grusht shteti të dështuar.
Në një rrëfim për emisionin “Repolitix”, z. Spahiu deklaroi se si mik i afërt me viktimën (Azem Hajadrin) kishte dijeni paraprake për atentatin që po përgatitej ndaj tij. Ai pohoi se ekzekutimi i deputetit demokrat ishte i paralajmëruar, pasi vetëm një muaj më parë të ndjerit Hajdari i ishte bërë një tjetër atentat në Tropojë. Sipas tij, dy ditë para ngjarjes dihej se autorët kishin mbërritur në Tiranë, ndërsa vetë kishte biseduar me Azemin vetëm 30 minuta para se ai të mbërrinte në kryeqytet.
Juristi Spahiu hodhi akuza të forta ndaj pushtetit të atëhershëm, duke theksuar se në këtë krim u përfshinë drejtpërdrejt drejtues të lartë të Policisë së Shtetit, çka sipas tij, vërteton implikimin e Partisë Socialiste. Ai e cilësoi atë periudhë si më famëkeqen për vrasjet politike në vend, duke kujtuar se vetëm dy javë më pas u ekzekutua edhe ish-ministri i Mbrojtjes i Kosovës, Ahmet Krasniqi.
Më tej, juristi zbuloi se një javë para tragjedisë kishte qenë në një drekë të përbashkët me Hajdarin dhe Krasniqin, të cilët mbetën viktima të së njëjtës klimë terrori shtetëror. “Unë jam dëshmitar i asaj vrasje. Azem Hajdari ka qenë shoku im i fakultetit, miku im, bashkëpunëtori im, kemi qëndruar pranë, kam pasur dijeni për atentatin që do të zhvillohej. Një muaj më parë i ishte bërë atentat në Tropojë. Më pas është pasur dijeni dy ditë më parë se persona që zhvilluan atentatin kishin ardhur për ta organizuar. Kam biseduar me Azem Hajdarin 30 minuta para se të mbërrinte në Tiranë në telefon.
Dhe pavarësisht nga bindjet politike, unë jam njeri që qëndroj edhe pas shumë vitesh korrekt në miqësinë apo të vërtetat e ngjarjes. Një javë para se të vritej Azem Hajdari, kam qenë edhe në një drekë me një personazh tjetër, të tre së bashku, me Ahmet Krasniqin, ish-ministrin e Mbrojtjes së Kosovës, të qeverisë në mërgim të Rugovës, i cili është vrarë dy javë pas vrasjes së Azem Hajdarit dhe ai ka qenë muaji më famëkeq i dy vrasjeve politike në Tiranë”, deklaroi mes të tjerash Spahiu.
Spahiu: Berisha dhe PD organizuan grushtin e shtetit të 14 shtatorit 1998
Ndërkohë juristi Kreshnik Spahiu ka rrëfyer prapaskenat e ngjarjeve të dhunshme të shtatorit 1998, duke bërë përgjegjëse Partinë Demokratike dhe liderin e saj Sali Berisha për orvatjen e dështuar të grushtit të shtetit. Si dëshmitar i asaj periudhe të errët, Spahiu tregoi se kishte marrë pjesë deri në mbrojtjen ligjore të disave prej të pandehurve, për të cilët nuk u provua dot fajësia në gjykatë. Ai zbuloi se kjo përpjekje për marrjen e pushtetit me dhunë u ndërpre vetëm pas ndërhyrjes së prerë të SHBA-së. Sipas Spahiut, ishte vetë ndihmës-sekretarja amerikane e Shtetit ajo që i kërkoi prerazi Berishës të tërhiqej, duke e kërcënuar se Uashingtoni nuk do të njihte kurrë një regjim të vendosur përmes forcës.
Juristi rikujtoi se vrasja e Azem Hajdarit nga drejtues policie directly përpara zyrave të partisë mbetet një krim makabër, por kjo nuk e arsyetonte dhunën politike. Ai e cilësoi si marrjen e pushtetit me forcë, ashtu edhe ekzekutimet politike, si dy faqe të errëta të historisë që nuk duhet të përsëriten më kurrë. Me këtë dëshmi, Spahiu ndriçon presionin e madh diplomatik që parandaloi përshkallëzimin e mëtejshëm të kaosit në Shqipëri. “Më pas kam qenë dëshmitar sesi u organizua grushti i shtetit, arsyet pse u organizua, deri në mbrojtjen ligjore në Gjykatë të disa prej të pandehurve, për të cilët nuk u provua dhe nuk u faktua dot që ishin pjesë e organizimit të grushtit të shtetit. Është një ngjarje e errët.
Më pas kam biseduar edhe me ndihmës/sekretaren e Shtetit që i kërkoi PD-së dhe kryetarit të PD-së që të tërhiqej, sepse nuk do të njihte një pushtet të marrë me dhunë. Mos të harrojmë që është vrarë një zyrtar kaq i lartë para zyrave të një partie dhe është vrarë nga drejtues policie. Sigurisht që marrja e pushtetit me dhunë është e papranueshme, ashtu siç janë edhe vrasjet politike të papranueshme. Të dy ngjarje të errëta që nuk duhen përsëritur”, u shpreh Spahiu.
Kreshnik Spahiu: Hajdari e Krasniqi u vranë në sfondin e përplasjes FARK-UÇK
Nga ana tjetër, juristi Kreshnik Spahiu është shprehur se vrasja e Azem Hajdarit dhe Ahmet Krasniqit lidhen me armatimin për çlirimin e Kosovës, të dërguar nga Shqipëria. Z. Spahiu theksoi se PD dhe PS mbështesnin dy fraksione të ndryshme që ishin krijuar për çlirimin e Kosovës, respektivisht FARK dhe UÇK. “Kur të dy palët implikoheshin në një proces penal, ishin të interesuara që dosja të mos zbardhej. Të ngjarjet e 12 apo 14 shtatorit të dyja palët janë të implikuara. Njëra palë ishte e implikuar për vrasjen, tjetra për grushtin e shtetit.
Është shumë e vërtetë që në atë kohë palët ishin të ndara. Liderët e PD-së ishin të lidhur me qeverinë e Rugovës dhe Qeverinë në azil të drejtuar nga Bujar Bukoshi dhe që kishin ministër të Mbrojtjes Ahmet Krasniqin. FARK-u që ishte ushtria e qeverisë në mërgim po tentonte që të armatosej njëkohësisht njësoj si UÇK. UÇK ishte e lidhur me socialistët dhe segmentet e PS. Në atë periudhë Shqipëria e përfshirë në furnizimin me armë dhe mbështetjen për çlirimin e Kosovës. Nuk është e rastit që pas 30 vitesh po hetohen vrasje të shqiptarëve me njëri-tjetrin.
Nëse duam ne sot pas 30 vitesh që të kemi një qartësi politike për ngjarjet, duhet të kuptojmë se në ato dy vrasje kemi të përfshirë të njëjtin grup. Pra këta kanë qenë target për të njëjtat arsye”, nënvizoi juristi i njohur, Kreshnik Spahiu në rrëfimin e tij për emisionin “Repolitix” në “Report Tv”.
Çfarë ka ndodhur?
Kujtojmë se në datat 13 dhe 14 shtator 1998, duke përfituar nga ceremonia mortore e ishdeputetit Azem Hajdari, Partia Demokratike dhe kryetari Sali Berisha, organizuan një kryengritje të armatosur, me qëllim përmbysjen me dhunë të rendit kushtetues në Shqipëri. Berisha dhe persona të tjerë kanë bërë thirrje për përdorimin e dhunës, kanë nxitur qytetarë të ndryshëm për armatosjen e tyre, me synim pushtimin me forcë të rezidencave qeveritare dhe Radio Televizionit Shqiptar. Gjatë tubimeve të dhunshme, u kryen një sërë plaçkitjesh në rezidencat kryesore të shtetit, si dhe u goditën me armë zjarri forcat e Policisë dhe Gardës, si dhe zyrtarët që punonin në këto institucione, një pjesë e të cilëve u keqtrajtuan edhe fizikisht.