Protestat në mbështetje të Hashim Thaçit, Kadri Veselit, Rexhep Selimit dhe Jakup Krasniqit vazhduan edhe mbrëmjen e së shtunës, për natën e katërt radhazi në sheshin “Skënderbeu” në Prishtinë, ku mijëra qytetarë kundërshtuan njëzëri vendimin e Gjykatës Speciale që dënoi katër ish-krerët e UÇK-së.
Ashtu si në netët e mëparshme, pjesëmarrësit brohoritën “UÇK, UÇK”, valëvitën flamuj kuqezi të UÇK-së, ndërsa protesta u hap me leximin në kor të betimit të ushtarit.
Pamjet nga sheshi treguan pjesëmarrje të madhe, veçanërisht të të rinjve, të cilët kanë qenë më aktivët që nga nisja e tubimeve. Organizatorët thanë se protestat do të vazhdojnë edhe në ditët në vijim.
“Nuk na ka bashkuar partia, na ka bashkuar UÇK-ja”, deklaroi një prej organizatorëve, Çlirim Haziri, duke shtuar se tubimet do të vazhdojnë derisa, sipas tij, të ketë drejtësi për ish-drejtuesit e UÇK-së.
Mbështetja nuk mbeti vetëm në Kosovë. Gjatë së shtunës u zhvilluan protesta edhe në diasporë, në Këln dhe Mynih të Gjermanisë, Cyrih të Zvicrës, Vjenë të Austrisë dhe në Kanada, ku shqiptarët u mblodhën në tubime paqësore në mbështetje të katër ish-krerëve të UÇK-së.
Në Gjermani, pamjet e publikuara në rrjetet sociale treguan edhe ndërhyrjen e policisë, e cila u hoqi disa protestuesve flamujt kombëtarë shqiptarë dhe flamujt e UÇK-së.
Ndërkohë, platforma “Liria ka Emër” ka paralajmëruar protestën e radhës jashtë Kosovës. Sipas organizatorëve, më 22 shtator, komuniteti shqiptaro-amerikan do të organizojë një tubim para selisë së OKB-së në Nju Jork, në vazhdën e reagimeve kundër vendimit të Dhomave të Specializuara.