Aktori britanik Sacha Baron Cohen ka kërkuar falje publikisht për herë të parë ndaj qytetarëve të Kazakistanit për mënyrën se si vendi i tyre është paraqitur përmes personazhit të famshëm të Boratit.
Gjatë një deklarate, aktori pranoi se kritikat e ambasadës së Kazakistanit në fillim të projektit ishin të drejta, duke shpjeguar se personazhi i Boratit fillimisht nuk ishte menduar të vinte nga ky shtet.
“Kisha filluar ta zhvilloja Boratin për BBC-në dhe në atë kohë ai ishte nga Shqipëria. Dua t’u kërkoj falje njerëzve të Kazakistanit, sepse Borati nuk ka asnjë lidhje me Kazakistanin.Kombësia ndryshonte vazhdimisht, në varësi të televizionit që financonte projektin. Fillimisht ishte shqiptar, më pas mendova për Moldavinë dhe kur HBO e bleu projektin, më duhej një vend tjetër. Mendova: Cili është një vend për të cilin askush nuk di pothuajse asgjë? Kazakistani.”-ka rrëfyer Cohen.
Cohen zbuloi gjithashtu një detaj interesant nga prapaskenat e krijimit të personazhit: Borati ishte konceptuar fillimisht si shqiptar, gjatë kohës kur projekti po zhvillohej për BBC-në. Më pas ishte shqyrtuar edhe mundësia që personazhi të vinte nga Moldavia, me emrin Aleksei Krikler.
Megjithatë, kur projekti u ble nga HBO, aktori vendosi që Borati të ishte nga Kazakistani, duke argumentuar se ishte një vend për të cilin publiku ndërkombëtar dinte shumë pak.
Në deklaratën e tij, Cohen iu drejtua qytetarëve kazakë, duke theksuar se nuk kishte pasur si qëllim të ofendonte popullin dhe kulturën e tyre.
“Ju kërkoj të mos e merrni personale. Unë respektoj njerëzit dhe kulturën tuaj. E vërteta është se gjithçka nuk kishte të bënte me Kazakistanin, por me paditurinë e njerëzve me të cilët flisja, të cilët mund të besonin se këto gjëra të çmendura ndodhnin në një vend për të cilin nuk kishin dëgjuar kurrë.”-ka vijuar Cohen.
Ai pranoi se personazhi i Boratit nuk kishte të bënte me realitetin e Kazakistanit, por ishte krijuar për të vënë në pah paragjykimet dhe paditurinë e njerëzve që takonte gjatë xhirimeve.
Kërkimfalja e aktorit rikthen në vëmendje edhe historinë e pazakontë të personazhit, i cili fillimisht ishte menduar si shqiptar, përpara se të merrte identitetin kazak që e bëri të famshëm në mbarë botën.
