Në kurthin e tij kanë rënë të paktën 39 persona
Prej kohësh, Policia e Shtetit po publikon listën me emrat e personave më të rrëzikshëm në çdo qytet, duke kërkuar ndihmën e qytetarëve për kapjen e tyre. Në listat e publikuara deri më tani nuk kanë munguar dhe emrat shumë të njohur për drejtësinë shqiptare, të cilët kanë tronditur shumë herë vendin me vrasje e krime të tmerrshme, por edhe emrat e zyrtarëve të lartë, që në kohë të ndryshme kanë drejtuar vendin.
Kjo është vënë re në listën më të fundit të nxjerrë nga policia një ditë më parë, ku ishin 24 personat më të rrezikshëm për Qarkun e Durrësit.
Në listën e zezë për këtë qark, pjesa më e madhe janë të dënuar për vrasje, por ka dhe për shfrytëzim prostitucioni, mashtrim, vjedhje me pasojë vdekjen, trafikim fëmijësh, trafikim femrash, përdhunim dhe drogë.
Mes 24 personave të konsideruar si mjaft të rrezikshëm rezultonin edhe tre shtetas të huaj: një italian, një grek dhe një shtetas amerikan. Por, ajo që ka tërhequr më shumë vëmendje ishte emri i Kujtim Kllogjerit, që dilte në listën e zezë të të shumëkërkuarve. Emri i Kllogjerit nuk është i panjohur për shqiptarët, pasi në vitet 1990 ai ka qenë kryebashkiak i Gramshit. Gjithashtu, Kujtim Kllogjeri është edhe pronari i kompanisë së ndërtimit “G&Xh” sh.p.k. Ai është dënuar me 11 vjet e 6 muaj burg nga Gjykata e Apelit të Durrësit për “Mashtrim më shumë se një herë dhe me pasoja të rënda”.
Mësohet se në kurthin e tij kanë rënë të paktën 39 persona përmes shitjes së shumëfishtë të apartamenteve. Kllogjeri ka humbur çdo gjurmë dhe nuk i dihet vendndodhja prej shkurtit të vitit 2017. Dyshohet se Kllogjeri ka marrë 2.1 milionë euro nga shitja e apartamenteve për herë të dytë apo të tretë dhe është zhdukur, duke i shpëtuar drejtësisë.
