Historia me Skënderbeun nuk ka bërë që ekipet shqiptare të zënë mend. Ishte e paralajmëruar dhe frika më e madhe doli, Luftëtari është nën hetim për trukime nga UEFA. Skuadra gjirokastrite e bëri baltë në dy ndeshje ndaj Ventplisit që humbi me rezultatin 5-0 dhe barazoi 3-3.
Në verë të gjithë ngritëm dyshime, por pikat mbi “i” i vendos UEFA që me anë të një shkrese bllokon fondet për gjirokastritët dhe informon sekretarin e FSHF-së, Ilir Shulku, për faktin se ekipi i presidentit Grigor Tavo është nën hetim. Situatë e errët dhe dënimi duket se troket në prag. Situata te Luftëtari është skandaloze. Procesi Sportiv zbuloi lajmin për nisjen e hetimeve.
Shkresa – “Kjo korrespondencë është për t’ju dhënë informacion në lidhje me shpërndarjen e pagesave të solidaritetit për klubet pjesëmarrëse në fazën kualifikuese të Ligës së Europës për sezonin 2018-2019.
KS Luftëtari është i përfshirë në disa ndeshje të Ligës së Europës të cilat janë në hetim paraprak nga Komisioni i Integritetit i UEFA sipas nenit 12 të Rregullores Disipliniore të UIEFA-s. Vini re që pagesat e solidariteti janë bllokuar në pritje të përfundimit të hetimit.
