Akademia e Sigurisë ka marrë akreditimin institucional si Institucion i Arsimit të Lartë, pa tani më do të quhet Universitet. Lajmi është bërë me dije nga vetë Rektori i Akademisë së Sigurisë, Ilirjan Mandro.
Një gjë e tillë ndodh për herë të parë që nga krijimi i këtij institucioni dhe do të jetë i vlefshëm për 5(pesë) vite akademike deri më 2028. Sipas Mandro, ky është një vlerësim për punën e stafit.
“Rektori i AS Prof. Ilirjan Mandro, ka kënaqësinë të ndajë një lajm të gëzuar dhe me shumë rëndësi për Akademinë e Sigurisë.
Për herë të parë AS, mori akreditimin institucional si Institucion i Arsimit të Lartë, me kohëzgjatje prej 5(pesë) vite akademike deri më 2028.
Vlerësim stafit të angazhuar që prej muajit qershor-dhjetor 2022, mundi të bëj gati materialet voluminoze prej 6000 faqesh shqip-anglisht, bazë mbi të cilën u bë vlerësimi i institucionit”, thuhet në njoftimin e bërë publike nga Akademia e Sigurisë.
Me VKM nr. 185 datë 25.2.2015, u krijua Akademia e Sigurisë, përgjegjëse edhe për edukimin dhe trajnimin e punonjësve të strukturave të sigurisë në Shqipëri. Akademia e Sigurisë përmban aktualisht Fakultetin e Sigurisë dhe Hetimit, Kolegjin e Lartë Policor, Qendrën Kërkimore Shkencore dhe disa njësi të tjera bazë.
