Përfundojnë dy ndeshjet e grupit D. Anglia dhe Kroacia janë kualifikuar për më tej. “3 luanët” kanë mundur minimalisht Çekinë dhe kanë marrë vendin e parë në grup.
Rahim Stërling zhbllokoi shifrat në minutën e 12. Pasi sulmuesi i Mançester Sitit goditi shtyllën, në rastin e dytë përfitoi nga krosimi i bukur i Grealish, duke shënuar me kokë në shtyllën e dytë.
Skuadra britanike e nisi fort ndeshjen, duke i dhënë kënaqësinë e parë tifozëve. Ndërkohë, lajmi keq që është marrë sot, është se si Maunt, ashtu edhe Çilluell, do të mungojnë në fazën e 1/8-tave të Europianit, pasi do të vazhdojnë të jenë në izolim
Në ndeshjen tjetër, Kroacia ka shkatërruar Skocinë, duke siguruar vendin e dytë dhe pjesëmarrjen në fazën tjetër të “EURO 2020”.
Kroatët zhbllokuan shifrat në minutën e 17. Pas një krosimi në zonë, Perisiç uli bukur një top me kokë për Vlasiç.
Kur mendohej se pjesa e parë, do të mbyllej me fitoren e ekipit të Zlatko Daliç, skocezët barazuan shifrat në minutën e 42 me Kollum Mekgregor.
Në pjesën e dytë dhe pikërisht në minutën e 62, Kroacia dyfishoi shifrat. Luka Modriç realizoi një gol spektakolar. Një goditje nga jashtë zonës me të jashtmen dhe të fortë, duke kujtuar kohët e arta të Roberto Karlos.
Në minutën e 77, Perisiç realizoi golin e tretë dhe të kualifikimit për Kroacinë, pas një harkimi nga këndorja të Luka Modriç. Ky mund të jetë goli i kualifikimit për ballkanasit.
