Goditjet në nivele të larta pritet të nisin në fillim të vitit 2019. Duke qenë se në qershor të vitit të ardhshëm jepet vendimi për hapjen e negociatave dhe një ndër kushtet kyçe është lufta kundër korrupsionit, qeveria ka vendosur të lëvizë në këtë drejtim. Pak kohë më parë Ministria e Drejtësisë hartoi një Strategji Ndërsektoriale kundër Korrupsionit për periudhën 2018-2020, ndërsa së fundmi është hartuar një raport mbi ato çka është arritur të përmbushet gjatë 3-mujorit të parë të këtij viti.
Sipas raportit të siguruar nga gazeta, ILDKP ka nënshkruar një marrëveshje që ka si qëllim përdorimin e sistemit online për deklarimin e pasurive të deputetëve e ministrave, ku akses do të ketë prokuroria, qytetarët dhe të gjitha institucionet. “Forcimi i regjimit të deklarimit dhe kontrollit të pasurive të zyrtarëve publikë dhe rasteve të konfliktit të interesave. Në zbatim të këtij objektivi, për 3-mujorin e parë, është realizuar procedura e prokurimit dhe nënshkrimi i kontratës për zhvillimin e software.
Procedura e prokurimit për EACIDS u përfundua në fillim të muajit shkurt 2018 me nënshkrimin e kontratës me kompaninë e IT-së me qendër në Tiranë ikubINFO për zhvillimin e sistemit të ri”, thuhet në raport. Një marrëveshje e tillë përforcon regjimin e zbulimit, transparencës dhe kontrollit efektiv të pasurisë së zyrtarëve publikë, si edhe rastet e konfliktit të interesit. Kjo lehtëson punën e prokurorisë, e cila tashmë ka më shumë mundësi të bjerë në gjurmët e pasurive të dyshimta të deputetëve e ministrave.
Pronat
Përmes Strategjisë Ndërsektoriale Antikorrupsion, në dorë të prokurorisë do të bien më kollaj edhe të dhënat e dyshimta për pronat e ministrave, deputetëve e zyrtarëve publikë. Prokuroria e Përgjithshme ka nënshkruar një marrëveshje në mars me ZVRPP, ku i lejon vetes që të ndërhyjë në të dhënat e kësaj të fundit për të pikasur raste të dyshimta e për të thelluar luftën antikorrupsion. “Në muajin mars 2018 u nënshkrua me Zyrën Qendrore të Regjistrimit të Pasurive të Paluajtshme marrëveshja e bashkëpunimit “Për dhënien e të drejtës së aksesit prokurorisë në regjistrin elektronik të pasurive të paluajtshme”.
Në proces teknik ndërlidhja. Po kështu në muajin mars 2018, PP i është drejtuar Agjencisë Kombëtare të Shoqërisë së Informacionit me kërkesë për akses në disa module të portalit e-albania, nga ku tashmë marrin akses për printim pa kosto të 5 dokumenteve”, thuhet në raportin e Ministrisë së Drejtësisë.
Financat e partive
Një tjetër pikë që qeveria e konsideron si mjaft problematike që ndihmon korrupsionin dhe që ka marrë masa është ajo e financimit të partive politike. Në lidhje me këtë, gjatë këtij 3-mujori qeveria ka hartuar një marrëveshje në bashkëpunim me ndërkombëtarët që ka në thelb forcimin e kontrolleve dhe auditeve mbi financimin e partive politike, ku do të evidentohen lëvizjet e dyshimta.
“Forcimi i regjimit të kontrolleve mbi financimin e partive politike, ka si qëllim integritetin e partive politike, si parakusht thelbësor për integritetin e qeverisjes dhe parandalimin e korrupsionit. Përsa i përket aktivitetit mbi draftimin dhe miratimin e modelit standard për raportimin financiar për vitin kalendarik, e cila është parashikuar të realizohet në vitin 2019, gjatë tremujorit të parë 2018, KQZ në bashkëpunim me ekspertët e Këshillit të Evropës ka hartuar draftet, të cilat janë në proces konsultimi me ekspertët e IEKA-s.
Regjimi kontrollues për financimin e partive politike kërkon përfundimin e raporteve të auditimit të jashtëm mbi financimet e pranuara nga secila parti politike”, thuhet në raporti ./Mimoza Ibra
