Thellohen skandalet e Anastas Angjelit dhe një grupi deputetësh të PS me ligjin për Akademinë e Shkencave. Gazeta tregoi pak ditë më parë se si Angjeli dhe 14 deputetë të tjerë kanë çuar në Kuvend një ligj mjaft problematik. Vetë Angjeli është anëtar i Akademisë së Shkencave dhe është në konflikt interesi, ndërsa emrat e tjerë janë pedagogë, por që nuk e dinë nga bie dera e Akademisë. Sot Komisioni i Mediave dhe Arsimit do diskutojë draftin që ka shkuar në Kuvend, në kuadër të reformimit të akademisë. Por akademiku Artan Fuga, anëtar i kësaj akademie, ka lëshuar akuza të forta ndaj deputetëve propozues të ligjit.
Fuga letër Ruçit
Profesor Artan Fuga i ka dërguar një letër të hapur kreut të Parlamentit, Gramoz Ruçi, ku kërkon që të mos miratohet ky ligj. Ligji që ka shkuar në Parlament është firmosur nga disa deputetë të PS, por sipas akademikut, një lëvizje e tillë është mjaft problematike. “Fillimisht ju bëj me dije që ajo që paraqitet si iniciativa e tyre ligjore në fakt nuk është veçse një rrëmbim në Ministrinë e Arsimit të tekstit të projektligjit të përgatitur nga komisioni i Akademisë të pareformuar të Shkencave, dhe paraqitje e tij si produkt i këtij grupi deputetësh.
Kam shumë arsye të dyshoj që as e kanë lexuar me seriozitetin e duhur çfarë kanë paraqitur përderisa një projektligj që paraqitet si iniciativë ligjore e deputetëve në fjalë qysh në fillim shprehet se është një nismë dhe propozim i qeverisë”, ka deklaruar profesor Fuga. Sipas tij, këta deputetë janë treguar fare të papërgjegjshëm për arsye se pretendojnë të ndërmarrin një iniciativë ligjore në mënyrë arbitrare dhe pa treguar seriozitetin e duhur në veprimet e tyre.
Sipas Fugës, nuk mund të ndërmerret një nismë e tillë pa bërë asnjë studim për gjendjen në këtë institucion. “Nuk kanë ardhur asnjë sekondë të vetme në Akademinë e pareformuar të Shkencave për të bërë zyrtarisht dhe sipas procedurave përkatëse një konsultë të vetme me Asamblenë e Akademisë të pareformuar të Shkencave apo edhe më gjerë se aq.
Nuk kanë konsultuar zyrtarisht deri në çastin e dorëzimit të atij projektligji asnjë ekspert të pavarur dhe pa konflikt interesi! Kështu mund të sillen projektligjet për t’u debatuar në komisionet përkatëse? Unë nuk besoja se ju do ta lejonit këtë farsë”, thuhet aty.
Argumentet
Profesor Fuga ka deklaruar se ai vetë ka depozituar në Ministrinë e Arsimit një platformë të vetën mbi mënyrën se si duhet të ndryshojë Akademia e Shkencave. Por sipas tij, deputetët kanë marrë platformën e përgatitur nga emrat e tjerë. “Ju mbase nuk e dini që platforma në fjalë që unë kam përgatitur është marrë në shqyrtim nga Ministria e Arsimit pas një rekomandimi publik bërë nga kryeministri i vendit.
Pretendohen gjithfarë naivitetesh, por ju bëj me dije se është krejtësisht arbitrare dhe e padenjë që të merret një version i kuadrit reformues duke injoruar rivalin e tij. Asnjë takim a konsultë me mua si përfaqësues i kritikës ndaj Akademisë të pareformuar të Shkencave dhe përpilues i platformës alternative të reformimit të saj, marrë në shqyrtim zyrtarisht nga Ministria e Arsimit, ky grup deputetësh nuk ka denjuar të ndërmarrë”, ka thënë ai. Fuga i ka dërguar dhe një mesazh ministres së Arsimit.
Ai u shpreh se ajo nuk duhet të heshtë për këtë skandal. “Është detyrë e ministres, Besa Shahini, të shpjegojë heshtjen dhe mosveprimin e saj për të kryer detyrën e ngarkuar nga kryeministri, por si dëshmitar i ngjarjes, nuk mund të mos Ju informoj edhe për arbitraritetin e ndërhyrjes të deputetëve tuaj edhe për mefshtësinë e reagimit dhe indiferencën e zonjës Besa Shahini për ta trajtuar me profesionalizëm dhe pjekuri rastin. Duket sikur ajo hoqi një peshë të rëndë nga vetja”, tha ai. Sipas akademikut, grupi i deputetëve ka injoruar, fyer, marrë nëpër këmbë komunitetin shkencor dhe universitar të vendit.
“Juve mbase nuk Ju kanë informuar fare ata që e kishin për detyrë ta bënin këtë gjë, që zyrtarisht Ministria e Arsimit kishte dërguar në të gjitha universitetet dhe qendrat kërkimore të vendit për konsultim si projekt-platformën time, ashtu edhe projektligjin e Akademisë të pareformuar të Shkencave. Ministria i ka marrë rezultatet e këtij konsultimi dhe paturpësisht i mban të pabotuara dhe të fshehura! Grupi i deputetëve Tuaj jo vetëm që nuk i ka përfillur, por as ka marrë mundin t’i analizojë”, tha ai. /Kliti Topalli