Javën e kaluar zëdhënesi i presidentit Ilir Meta tha se do te publikohej një video me fakte përvëluese.
“Ju bëj me dije se brenda javës Institucioni i Presidencës do të publikojë një VIDEO me fakte të pakundërshtueshme për opinionin vendas dhe botëror, që të mos ngelet asnjë analfabet në planet, i cili të mos e kuptojë dhunimin që një bandë ka tentuar t’i bëjë Kushtetutës dhe Gjykatës Kushtetuese të Republikës së Shqipërisë.
Kjo VIDEO me prova të pakundërshtueshme, do zbulojë fytyrën e vërtetë të një individi të papërgjegjshëm, i cili guxoi në mënyrë të tmerrshme kriminale t’i përvetësojë kompetencat kushtetuese Presidentit të Republikë” shkroi Tedi Blushi.
Të njëjtën gjë konfirmoi dhe vetë kreu i shtetit : “Provat po shtohen. Garantët e krimit kushtetues po dalin vetë. Video po përgatitet”!-shkruajti më 17 nëntor në Facebookun e tij.
Menjëherë mediat filluan spekullimet se aty mund të gjendeshin nga bisedat e regjistruara të Dvoranit në KED e deri tek implikimet të diplomatëve të huaj me zyrtare të qeverisë.
Por as saktësimi i zëdhënësit dhe as premtimi i Metës se videoja do të ishte publike në fillim të kësaj jave, ende nuk janë bërë reale. E hëna erdhi e iku madje po vjen e hëna tjetër dhe presidenti nuk e publikoi videon. Siç duket ai ka marr një “tur” udhëtimesh nëpër Shqipëri dhe nuk ka ndërmend të na e shuaj kureshtjen.