Presidenti i Republikës, Ilir Meta, ka reaguar pas deklaratës së Departamentit Amerikan Shtetit. Meta ka përsëritur faktin se do bashkëpunojë ngushtë me DASH për zbatimin e Reformës në Drejtësi.
“Presidenti i Republikës Sh.T.Z Ilir Meta vlerëson maksimalisht deklaratën e sotme të Departamentit të Shtetit të SHBA.Presidenti Meta konfirmon vendosmërinë e Tij për të bashkëpunuar ngushtë me DASH dhe SHBA për zbatimin e Reformës në Drejtësi sipas Kushtetutës së miratuar në bashkëpunim me SHBA dhe Komisionin e Venecias. Presidenti Meta i qëndron besnikërisht të gjitha qëndrimeve të tij të qarta dhe transparente, të shprehura zyrtarisht për përfaqësuesit e lartë amerikanë gjatë 5 viteve të fundit, që i përsëriti dhe në bisedën zyrtare telefonike që zhvilloi mbrëmjen e 20 nëntorit me Zv.Ndihmës Sekretarin e Shtetit të SHBA, z.Matthew Palmer. Aleanca strategjike midis Shqipërisë dhe SHBA dhe miqësia e shkëlqyer midis dy vendeve dhe popujve tanë është e palëkundur”, shkruhet në reagimin e Presidentit.
Departamenti Amerikan i Shtetit duke iu përgjigjur Zërit të Amerikës tha se “respektimi i ligjit është mbi të gjitha”./Fjala.al
