Ish-ministri i Financave dhe Ekonomisë, Arben Ahmetaj, i ftuar në emisionin ‘Mbrëmje Ide’ në ABC News ka komentuar deklaratat e Presidentit Meta.
Gjatë ditës së sotme, Meta tha se klasa politike shqiptare duhet të marrë përgjegjësitë e saj dhe çështjet duhet të zgjidhen në mënyrë transparente, me dialog, larg pazareve dhe keqpërdorimeve, qoftë edhe të ndonjë ndërkombëtari.
Ahmetaj është shprehur se gjuha e Presidentit është dygjuhëshe dhe e dykuptimtë. Sipas tij, ka dy fusha përplasjesh në demokraci. E para është parlamenti dhe e dyta janë zgjedhjet tha deputeti i PS-së duke bërë thirrje që opozita të largohet nga dhuna.
‘Qëndrimi i Presidentit është siç është dygjuhësh edhe i dykuptimtë. Është në traditën e presidenti aktual, ku në këndvështrimin tim politk tenton të ngarkojë me përgjegjësi të dy palët politike, ose të tre palët politike, ish-palën e tij, LSI-në. Po të ishte presidenti përpara gazetarëve, pyetja më e natyrshme është çfarë sistemi jeni duke i referuar? Sepse ne jemi në sistem demokratik. Kemi dalë ne jashtë parlamentit apo opozita? Dhe në çfarë sistemi merren përgjegjësitë?’, tha Ahmetaj.
