Publikimi i fotos nga Edi Rama së bashku me homologun e tij Dritan Abazoviç në bordin e Air Albania, padyshim që do ta vërë nën goditje kryeministrin e ri të Malit të Zi.
Do ta sulmojnë, siç e kanë sulmuar forcat proruse e pranë Kishës Ortodokse Serbe, e ky publicitet i shtuar do të rrisë dozat e akuzave ndaj tij. E nuk është çudi të marrë edhe një mallkim nga Kisha Ortodokse serbe e Malit të Zi.
Gjithsesi duhet thënë se vizita e Edi Ramës dhe Dritan Abazoviçit në Kiev me ftesë të presidentit të Ukrainës Volodomir Zelenski, vjen pas një hapi shumë të fortë, që ka edhe firmën e dy të ftuarve të kreut të Kievit.
Vendimit të fortë për të ndaluar ministrin e fuqishëm të Vladimir Putinit, Sergej Lavrov që të ulet në territorin e Ballkanit. Që duhet thënë, përveç Ramës, vendimi që e bllokoi totalisht Lavrovin të ulet në Beograd ishte ai i qeverisë së Malit të Zi, qeverisë së Maqedonisë së Veriut dhe qeverisë së Bullgarisë.
Si për “rastësi”, dy ditë pas këtij incidenti qeveria e Bullgarisë ra, si pasojë e largimit të një partie populiste që ka doza të forta proruse.
Vizita e dy anëtarëve të NATO-s në Kiev pas aktit ndaj Sergej Lavrov, është një akt i pastër politik që përcjell një gjeopolitikë krejt të ndryshme të Ballkanit.
Pak ditë më parë, në Ohër, Edi Rama, këtë mesazh e dha edhe në mënyrë literale.
“Të peshkohesh kaq kollaj nga sarkazma e një personazhi të mirënjohur botërisht për gjuhën sarkastike dhe manipulimi i kësaj sarkazme nga ata që i fryjnë zjarrit të dasisë dhe urrejtjes për interesa të politikës së ditës në katundet ballkanike është për të ardhur keq.
Nëse zotëria do të ishte mbështetësi i Ballkanit të Hapur, Ballkani do të ishte minimalisht për të. Por Ballkani për të është i mbyllur dhe nuk ka marrë leje për të hyrë në Ballkan nga vendet e Ballkanit”, tha Rama në samitin e Ballkanit të Hapur.
