Presidenti rus ka shtënë në punë një metodë të re në betejën e tij me Perëndimin, atë të ndjeshmërisë për tmerret në Ukrainë, që sipas tij nuk vijnë nga rusët por nga “neonazistët” ukrainas.
E ka bërë këtë në një telefonatë me presidentin francez Macron.
Ai i ka bërë thirrje Perëndimit që të ushtrojë presion mbi Kievin për të ndalur “tmerret” që po ndodhin në atë vend, raportojnë agjencitë ruse të lajmeve.
Putin i tha Macronit se Perëndimi mund të ndihmojë në ndalimin e “krimeve të luftës dhe bombardimeve masive të qyteteve dhe vendbanimeve në Donbas”, në të cilat po vuajnë civilët.
Rusia mohon që ushtria e saj po kryen krime lufte në Ukrainë dhe fajëson nacionalistët ukrainas dhe “neo-nazistët” për vdekjen e civilëve, gjë që Kievi dhe Perëndimi e refuzojnë.
“Perëndimi mund të ndihmojë në përfundimin e këtyre tmerreve duke ndikuar në mënyrë adekuate mbi autoritetet në Kiev dhe duke ndaluar dërgimin e armëve në Ukrainë,” tha Putin, raportoi RIA.
Putin i tha gjithashtu homologut të tij francez se Moska ishte ende e gatshme për dialog me Ukrainën.
Sipas kësaj logjike, edhe tmerret në Siri, ato me autorësi të qartë rusë, nuk paskan qenë të rusëve por të forcave opozitare siriane.
Ngjan e pabesueshme, por është e besueshme kjo po të kihet parasysh që është në natyrën e agresorëve, si në rastin e Serbisë, që realitetet e qarta t’i kthejnë përmbys, duke u vetëviktimizuar.
