Mos e besoni po deshët, por Hysen Memolla është emri i radhës i ftuar nga trajneri Edi Reja. Mbrojtësi i krahut të majtë do të jetë pjesë e grupit për ndeshjet me Islandën dhe Moldavinë.
Një grumbullim i çuditshëm dhe që vjen erë, pasi 26-vjeçari luan për Salernitanën e Lotitos dhe Tares. Kavajasi ka vuajtur shumë këtë sezon, pasi ka luajtur vetëm 2 ndeshje me ekipin e dytë të Hajduk Splitit dhe 3 ndeshje jo të plota me Salernitanën në Seria B.
406 minuta në të gjithë edicionin futbollistik 2018-19. A janë të mjaftueshme kaq minuta për të luajtur me kombëtaren, aq më tepër në Kroaci 2 (180 minuta) dhe Seria B (226)? Jo, sigurisht. Memolla kaloi në janar tek ekipi i Salernitanës dhe ka luajtur vetëm në 3 ndeshje, të gjitha sfida të humbura.
Ftesa e tij duket më shumë një “nder” për drejtorin sportiv të Lazios, Igli Taren, që ta shesë Memollën dhe t’i rrisë vlerat, se sa një vlerë e shtuar për Shqipërinë, shkruan Telesport. Aventura e Rejës me Shqipërinë duket se do të nisë me një njollë. Lajmin për ftesën e Memollës e ka dhënë vetë klubi i Salernitanës.
