Ministrja e Mbrojtjes e Gjermanisë, Christine Lambrecht (SPD), pëlqen që ta ketë djalin e saj në bord gjatë fluturimeve zyrtare.
Së fundmi të mërkurën, pak përpara Pashkëve, 56-vjeçarja Lambrecht fluturoi me shërbimin e gatshëm të ushtrisë gjermane nga Berlini për në Ladelund (Nordfriesland) ku vizitoi Batalionin e Luftës Elektronike 911.
Gjithashtu në helikopterin qeveritar ishte edhe djali i saj, Alexander, 21 vjeç. Më vonë ai postoi një foto në Instagram, i shtrënguar në helikopterin e qeverisë, me një urim për Pashkët.
Pikant është fakti se ishulli Sylt është përballë me Nordfriesland, ku ministrja shkoi për pushimet e Pashkëve me djalin e saj menjëherë më pas.
Dyshimi: A e kishte zgjedhur ministrja posaçërisht një vizitë te trupat në Sylt për të kaluar më pas pushimet e saj familjare në ishull? Dhe e gjitha kjo në mes të krizës në Ukrainë?
Udhëtimi i saj me helikopter tani shtron pyetjen: sa seriozisht e merr ministrja e Mbrojtjes punën e saj, veçanërisht në kohë lufte?
Thorsten Frei, Sekretari i parë Parlamentar i CDU/CSU, tha për BILD: “Përdorimi i ushtrisë për qëllime private dhe partiako-politike është pa stil. Ministrja nuk duhet të ngatërrojë Lufthansa-n me mjetet fluturuese të ushtrisë”.
Fakt është se anëtarët e kabinetit lejohen të marrin anëtarët e familjes në avionët qeveritarë. Ministria tha se fluturimi dhe rimbursimi i kostove është bërë në përputhje të plotë me udhëzimet për përdorimin e mjeteve të gatshme të fluturimit.
Por paraardhësja e saj e CDU, Ursula von der Leyen nuk i mori asnjëherë anëtarët e familjes me vete. Edhe me paraardhësen Annegret Kramp-Karrenbauer nuk ka ndodhur diçka e tillë.
Nga ana tjetër, me Lambrecht nuk është hera e parë: kur ishte ministre e Drejtësisë, ajo e mori djalin e saj në gjithsej shtatë udhëtime jashtë vendit: në Slloveni, Helsinki, Lihtenshtejn, Lisbonë, Luksemburg, Paris dhe Pragë. Shpenzimet e udhëtimit paguheshin gjithmonë privatisht.
Kryetarja e Komisionit të Mbrojtjes, Marie-Agnes Strack-Zimmerman, tha se nuk mund të komentojë ende, por e quajti një ngjarje të pazakontë.
“Nuk mund të gjykoj se çfarë fluturimi ishte, nëse ministrja ishte gjithsesi në këtë rrugë. Por kjo gjë nuk është korrekte, ne të gjithë e dimë këtë”, tha ajo.
Sipas saj, ministrja duhet të shpjegojë rastin.(BILD)
