Tashmë reforma në drejtësi është në një fazë të avancuar dhe ka dhënë dhe efektet e saj në shkarkimin e një numri të konsiderueshëm gjyqtarësh dhe prokurorësh. Megjithatë, një numër po ashtu i konsiderueshëm gjyqtarësh apo prokurorësh, të denoncuar nga media të ndryshme për problematika nga më të habitshmet, nuk kanë ngecur në rrjetën e vetingut.
Problematikat e denoncuara kanë prekur qoftë aspektet ekonomike të tyre, por dhe ato profesionale. Megjithatë, për arsye të paqarta për publikun, këta gjyqtarë e prokurorë i shpëtojnë vetingut. Një rast i tillë ka ardhur në redaksinë e MCN TV për një gjyqtare në detyrë, znj. Miranda Konica, gjyqtare pranë Gjykatës së Elbasanit.
Rasti i sjellë në vëmendjen e redaksisë ka të bëjë me një vendim të Gjykatës së Elbasanit, vendimi nr.4553 dt.8/7/2021, me një trup gjykues të kryesuar nga Miranda Konica. Ky vendim ka dënuar me 4 vite burg Behar Pemen, autorin e një aksidenti në rrugën Elbasan – Tiranë, ku humbën jetën dy vajza dhe mbetën të plagosura dy të tjera.
Bëhet fjalë për një aksident të ndodhur mbrëmjen e 13 shtatorit 2020, në dalje të tunelit në autostradën Elbasan – Tiranë, ku sipas padisë Behar Pema drejtonte i dehur automjetin dhe përplasi nga pas një veturë ku udhëtonin katër vajza, ngjarje kjo dhe e publikuar gjerësisht në media të ndryshme.
Kliki KËTU për të parë videon e raportimit të ngjarjes së rëndë
Theksojmë se në këtë aksident, dy prej vajzave humbën jetën, dy të tjera u plagosën rëndë. Gjyqtarja Miranda Konica ka argumentuar si rrethanë lehtësuese faktin se me një prej familjeve të viktimave ka normalizuar marrëdhëniet me autorin e aksidentit. Se çfarë do të thotë kjo, shumëkush mund ta imagjinojë vetë, por ndërkohë nuk përmendet viktima tjetër dhe të plagosurat e aksidentit.
Si dhe në mënyrë të qëllimshme nuk përllogarit tek rrethanat rënduese faktin e gjendjes tepër të dehur të Behar Pemes, kur kreu aksidentin horror. Sipas denoncimit, nëna e njërës prej vajzave është shprehur pas shpalljes së vendimit të gjykatës se ato nuk e kanë falur Behar Pemën. Ajo pretendon se janë mashtruar pasi avokati i autorit që u kishte kërkuar të firmosnin një akt noterial, ku thuhet se familjet nuk do të kishin hakmarrje mes tyre por ia lënë në dorë drejtësisë.
Sipas nenit 290 paragrafi 3 i Kodit Penal, kur shkelja e rregullave të qarkullimit rrugor shkakton vdekje ose plagosje të rëndë të disa personave, autori dënohet me 5 deri në 20 vite burg. Por me vendimin e saj, gjyqtarja Konica e ka konsideruar vdekjen e dy vajzave të reja dhe plagosjen e rëndë të dy të tjerave. Kujtojmë lexuesit se kjo masë është e barabartë me krimin e mbajtjes së dy cigareve hashash.
Por bëmat e kësaj gjyqtareje në prag të vetingut vazhdojnë edhe më tej dhe do të trajtohen në një shkrim të dytë.
