Kryeministri Edi Rama ndau dje në rrjetet sociale pamje nga “Gran Tour Albania”, aktiviteti që solli në Gjirokastër koleksionistë italianë të makinave retro.
“Të apasionuarit pas automobilizmit dhe turistët i dhanë një tjetër ngjyrë Gjirokastrës së vjeshtës”, shkroi Rama, krahas pamjeve nga aktiviteti.
Makinat e rralla u vendosën përgjatë rrugëve me kalldrëm të qytetit të gurtë, duke krijuar një atmosferë të veçantë në kombinim me tingujt e iso-polifonisë dhe peizazhin karakteristik të Gjirokastrës.
“Gran Tour Albania” i organizuar nga Old Cars Club dhe DPSHTRR mblodhi koleksionistë italianë të makinave historike, duke tërhequr vëmendjen e turistëve dhe të apasionuarve pas automobilizmit.
Aktiviteti u zhvillua në kuadër të një turi që promovon automobilat retro dhe destinacionet turistike shqiptare, ndërsa ndalesa në Gjirokastër solli një tjetër dimension në jetën turistike të qytetit gjatë vjeshtës.