Lirohet nga burgu kreu i “17 Nëntorit”, Aleksandros Giotopulos, i cili është dënuar si kreu i organizatës terroriste “17 Nëntori”, lirohet nga burgu pas 24 vitesh burgim
Sipas informacioneve të para, Gjykata e Apelit vendosi pozitivisht për kërkesën e tij për lirim, e cila ishte e pesta me radhë dhe ishte dorëzuar më 23 tetor 2025.
Giotopulos u arrestua në vitin 2002 dhe u dënua me burgim të përjetshëm nën akuzën e 23 vrasjeve të kryera nga kjo organizatë, mes tyre diplomatë dhe kuadro të misioneve diplomatike amerikane dhe britanike, politikanë, afaristë, policë, por edhe qytetarë të thjeshtë, viktima të organizatës gjakatare që nga viti 1975 deri në 2002.
Giotopoulos u gjykua si kreu politik i organizatës “17 Nëntori”. Ai nuk e pranoi kurrë se ishte ai lideri i saj, pavarësisht provave të autoriteteve.
Në burgjet greke mbeten ende të burgosur ekzekutorët e organizatës terroriste, Dimitris Kufodinas, vëllezërit Savas dhe Kristodhulos Ksiros.
Më 17 korrik 2002, ai u arrestua nga shërbimi antiterrorist në ishullin Lipsi. Ndaj tij u ngritën akuza për nxitje morale të vrasjeve, grabitjeve dhe shpërthimeve, si dhe për pjesëmarrje në organizatën “17 Nëntori”, bazuar në dëshmitë e bashkëpandehurve të tij dhe në provat që policia gjeti në banesat që mbante organizata.
Me vendim të Gjykatës së Apelit, ai u dërgua në gjyq me akuzën e nxitjes morale për të gjitha veprimet e organizatës që nga themelimi i saj e deri në korrik të vitit 2002, ndërsa iu atribuua roli i liderit dhe udhëheqësit të organizatës. Kundër këtij vendimi ai bëri një kërkesë për anulim, e cila u rrëzua nga Dhoma Penale e Gjykatës së Lartë.
