Massimiliano Nikolini, 43-vjeç nga Italia ka rënë në prangat e policisë ditën e sotme. Nikolini akuzohet për mashtrim dhe është shpallur në kërkim ndërkombëtar nga autoritet italiane.
Në 22 Nëntor të vitit 2018 ai është dënuar nga Gjykata e Breshias në Itali me 5 vite e 7 muaj burg.
Nicolini është një emër i njohur edhe për drejtësinë shqiptare. Për shumë vite ishte vetëshpallur si Konsull i Italisë në Shqipëri.
Skema e mashtrimit të tij ka nisur rreth vitit 2010 kur ai erdhi në Tiranë për herë të parë dhe hapi një fondacion të ashtuquajtur bamirës, të quajtur “Caritate Christi Compulsi Balcan”.
Bashkë me disa të ashtuquajtur agjentë të sigurimeve shëndetësore ai i prezantonte njerëzve një paketë sigurimi shëndetësore, me një çmim prej 12 mijë lekësh të reja.
Kjo skemë funksionoi për pesë vite rresht dhe personat që bënë pagesën nuk morën asnjë shërbim. Më pas përmes përdorimit të të dhënave të këtyre personave italiani kërkonte kredi në bankë dhe mashtrimi u kuptua në momentin kur banka i telefononte ata për të bërë pagesën e këstit të kredisë.
Ai prezantohej si mik i zyrtarëve të lartë shtetërorë, apo si konsull nderi i Italisë dhe Shqipërisë në vendet repsektive.
Në vitin 2012 ish e fejuara e tij shqiptare ka treguar për shqiptarja.com se si Nikolini kishte bërë në polici një denoncim të rremë ndaj Asllan Patriotit për vjedhje të makinës së tij tip Jaguar.
Vetë ajo ka deklaruar se është detyruar nga Nicolini të marrë një kredi prej 20 milionë lekësh dhe më pas është ndarë prej saj duke mos paguar as këstet në bankë.
Gjatë arrestimit Nicolinit iu sekuestruan në cilësinë e provës materiale një automjet, aparate celular dhe disa dokumente.