Hapet rruga për të zgjedhur kryeprokurorin e ri në vend. Rregullorja e miratuar pak ditë më parë nga Këshilli i Lartë i Prokurorisë është publikuar në Fletoren Zyrtarë dhe tashmë ka hyrë në fuqi. Aty janë dhënë detaje sesi do të bëhet përzgjedhja e kryeprokurorit, ndërsa tani hapet gara për këdo që është i interesuar të kandidojë. KLP do bëjë një renditje të kandidatëve dhe kjo do bëhet mbi bazë të: integritetit profesional të kandidatit në fushën e drejtësisë penale; integritetit moral; aftësive organizative dhe drejtuese; apo elementëve plotësues.
Në rastet kur kandidatët kanë të njëjtën meritë, vlerësohet vjetërsia në ushtrimin e profesionit dhe eksperienca profesionale. Sipas rregullores, vlerësimi profesional i çdo kandidati bazohet në kriteret e mëposhtme: kohëzgjatja dhe përshtatshmëria e përvojës në punë me pozicionin për të cilin konkurron (1– 5 pikë).
Rezultatet e vlerësimeve profesionale ose etike të kandidatëve në pozicionet e mëparshme, nëse ka, ose rezultatet e arritura gjatë përvojave të tyre të punës që lidhen me ushtrimin e funksioneve në fushën e drejtësisë penale (1–5 pikë).
Rezultatet e arritura gjatë studimeve të larta gjatë trajnimit fillestar në Shkollën e Magjistraturës, si dhe pjesëmarrja në trajnimin vazhdues dhe në kurse trajnimi të certifikuara në Shqipëri dhe jashtë Shqipërisë (1–3 pikë).
Rezultatet e arritura gjatë studimeve pasuniversitare në fushën e së drejtës penale (1–3 pikë); punime akademike, studime shkencore, shkrime dhe ligjërata profesionale, botime, pjesëmarrje në aktivitete shkencore (përveç atyre që kanë shërbyer për fitimin e gradës shkencore), pjesëmarrje në procesin e hartimit ose të konsultimit të legjislacionit dhe çdo angazhim tjetër profesional i kandidatit gjatë 5 viteve të fundit në fushën e së drejtës (1–4 pikë).
Vlerësimi moral do bazohet në reputacionin që kandidati gëzon në shoqëri dhe te kolegët. Ndërsa vlerësimi i çdo kandidati për aftësitë organizative dhe drejtuese do bazohet në kriteret e mëposhtme: cilësia e platformës dhe vizionit që ata paraqesin sipas shtojcës A të kësaj rregulloreje (1–5 pikë).
Aftësitë e provuara në marrjen e vendimeve dhe përgjegjësive, bazuar në përvojat e mëparshme profesionale dhe shoqërore (1–5 pikë); aftësitë në komunikim (1–4 pikë); aftësia për të punuar në grup dhe në mjedise multidisiplinare dhe/ose multikulturore (1 – 3 pikë); aftësia për përfaqësim në publik (1–3 pikë)
