Parlamenti ka rrëzuar dje 10 dekretet e presidentit Ilir Meta për ndryshimet në ligjet e reformës në drejtësi. Edhe pse ndryshimet u bënë me kërkesën e institucioneve dhe morën miratim nga ndërkombëtarët, presidenti Meta i bllokoi.
Por, në seancën e djeshme me rreth 90 vota, mazhoranca dhe disa deputetë të opozitës i rrëzuan këto dhjetëra dekrete. Me këtë zhvillim pritet që të ketë shumë surpriza në sistemin e drejtësisë, sidomos sa i takon luftës antikorrupsion. Një ndryshim bazë është ai, sa u takon kompetencave të Prokurorisë së Posaçme.
Më konkretisht, janë bërë ndryshime në nenin 75/a në Kodin e Procedurës Penale si edhe në Kodin Penal, apo ligjin e organeve të luftës antikorrupsion. Sipas këtyre ndryshimeve, SPAK nuk do të hetojë më korrupsionin në nivele të ulëta, por do të hetojë rastet kur kemi të bëjmë me korrupsion mbi 50 mijë lekë. Po ashtu, në kompetencat e SPAK do të jenë edhe abuzimet me tenderat mbi 800 mijë lekë.
Ndërkohë, një tjetër ndryshim ka të bëjë me Gjykatën Kushtetuese. Falë këtyre ndryshimeve, Gjykata e Lartë do ta ketë më të lehtë që të zgjedhë 3 përfaqësues të saj në Gjykatën Kushtetuese. Momentalisht, ligji përcakton se Gjykata e Lartë duhet që të ketë ¾ e anëtarëve për të marrë vendim, por ndryshimet e djeshme parashikojnë që vendimmarrja mund të merret edhe me gjysmën e anëtareve. Kjo do të sjellë plotësimin e Gjykatës Kushtetuese me 9 anëtarë. Po ashtu, ndryshime të tjera që u bënë ishin edhe sa u përket ndryshimeve në Kodin Civil si edhe për statusin e gjyqtarëve dhe prokurorëve në Republikën e Shqipërisë.
Gjonaj rrëzon argumentet e presidentit
Ministrja e Drejtësisë, Etilda Gjonaj, gjatë seancës së djeshme plenare të Kuvendit, foli sa i përket dekretit të presidentit Meta që ktheu në Kuvend paketën e ndryshimeve të reformës në drejtësi. Ajo tha se argumentet e Presidentit të Republikës, janë subjektive dhe të pabaza.
Sipas Gjonajt, miratimi me 96 vota në muajin mars i disa ndryshimeve në paketën e reformës në drejtësi kanë qëllim që qytetarët ta ndjejnë sa më shpejt rezultatet e drejtësisë nga institucionet e reformuara të drejtësisë shqiptare. “Paketa e rëndësishme legjislative e miratuar në këtë Kuvend më 23 mars 2021 përmbylli përpjekjen për të thjeshtuar dhe lehtësuar ecurinë e reformës në drejtësi me synimin e rritjes së efektshmërisë të sistemit të drejtësisë dhe për të garantuar që qytetarët të prekin sa më shpejt rezultatet e kësaj reforme.
Në këtë legjislaturë kemi punuar për më shumë se 7 muaj deri sa ndryshimet në 10 ligjet themelore të reformës në drejtësi u miratuan nga ky Kuvend. Dëshiroj të ritheksoj sot se argumentet e institucionit të presidentit, lidhur me miratimin përmes një procedure antikushtetuese dhe në mungesë të konsultimit gjithëpërfshirës, janë të pabaza, por cenojnë fort angazhimin real të partnerëve tanë ndërkombëtarë, të cilët me ekspertizën e tyre, kanë qenë dhe janë në krah të qeverisë shqiptare për zbatimin e reformës madhore, tek reforma në drejtësi”, tha Gjonaj.
Reagon Presidenca
Ndërkohë, pasi Kuvendi rrëzoi 10 dekretet e presidentit Meta për reformën në drejtësi, këshilltari për Çështjet Ligjore në Presidencë, Bledar Dervishaj, doli në një deklaratë për media. Dervishaj tha se Kuvendi nuk e argumentoi vendimin e tij për rrëzimin e dekreteve në baza ligjore. Sipas tij, u pa vetëm retorikë politike dhe gjuhë përbaltje.
“Sot fatkeqësisht pamë se si seanca plenare e Kuvendit që po i përfundon mandati rrëzoi 10 dekrete të Presidentit që rikthyen 10 ligje që prekin themelin e reformës në sistemin e drejtësisë. Ndërsa prisnim që të dëgjonim në diskutimet e deputetëve përpjekjen për të argumentuar ligjërisht rrëzimin e dekreteve, fatkeqësisht dëgjuam vetëm retorikë politike, fjalë boshe, pa asnjë vlerë për shoqërinë dhe shqiptarët, pa asnjë vlerë për sistemin e drejtësisë dhe një gjuhë përbaltëse dhe aspak të denjë për një shtet të së drejtës”, tha ndër të tjera ai. /NGA SIDORELA BRAÇJA