Doktori sot doli më herët nga salla e parlamentit, pasi, siç tha ai, nuk duronte dot aromat e parfumeve dhe rrobat e shtrenjta.
Duke qenë se afër tij zakonisht rri Albana, ajo u ndje në panik nga deklarata e Doktorit dhe menjëherë telefonoi Karminën:
– Na more më qafë, tha Albana.
Unë blej parfume tek ty me shpresë që këtij i është mësuar hunda me ato aroma.
Bile, bleva dhe parfumin “Karmina”.
Ai doli dhe më shau parfumin.
– Mos e ka pasur për parfumin e këtyre grave socialiste, pyeti Karmina?
– Po ku ka gra socialiste afër nesh!
Petro Koçin dhe Erion Braçen kemi në krahë, ku hedhin parfum ata!
Gjiknuri që përdor rri andej nga muri, e di unë!
Unë dhe Elda jemi afër tij.
– Dakord, do flas unë me të, tha Karmina, por duhet t’ia trajtoj me kujdes, se është temë delikate.
– Patjetër… Në fillim sigurohu që s’i ka ngelur qejfi dhe pastaj sqaroje.
– Patjetër.
Pasdite, Karmina shkoi në shtëpinë e Doktorit.
Pasi e përgëzoi për fjalimin, e hapi temën e parfumeve:
– Më ke bërë reklamë sot, tha ajo.
Ato gratë e PD-së i blejnë tek unë parfumet.
– Nuk e kisha për ato, i tha Doktori, e kisha për gratë socialiste.
Me thënë të drejtën, nuk është se më erdhi era parfum, por s’po qëndroja dot, doja të ikja.
Më goditi rëndë kjo vdekja e Sami Repishtit.
– Çfarë parfumi përdorte ai burri?
– Me thënë të drejtën, nuk e di.
Nuk i kam dhënë ndonjëherë dorën, por më trishton shumë kur më vdesin këta që më kritikojnë.
Më humbet motivi për të luftuar.
– D.m.th. nuk ke gjë kundër parfumeve të mia, pyeti Karmina?
T’i them Albanës të vazhdojë ta përdorë?
– Kategorikisht jo, tha Doktori. Aroma e saj më jep energji.
