Kryeministri Edi Rama zhvilloi një takim me drejtuesit e sistemit bankar në Shqipëri, teksa edhe bankat kanë rënë pre e sulmeve gjatë protestave të dhunshme.
Gjatë fjalës së tij, Rama u shpreh se sulmi ndaj bankave, ishte skenar djallëzor.
Kreu i qeverisë nënvizoi se personat e maskuar që kanë kryer dhunë, do të zbulohen përmes teknologjisë.
“Ne jemi një vend që Zoti na i ka dhënë të gjithë, por robi se ka lënë të ngrejë kokë. Po shikoja shifrat e ekonomisë, janë shumë inkurajuese për ne. Jemi vendi me rritjen më të madhe ekonomike në rajonin tonë. Po krahasohemi me rajonin tonë. Sot jemi aty aty me ata që ishin shumë më shumë përpara nesh. Ekonomia rritet me punë, jo me gurë. Rritet duke marrë secili përgjegjësitë e veta. Përgjegjësitë do i marrin ata që u turrën me gur e me zjarr mbi bankat, me skenar djallëzor, për të nxitur panik. Në sportelet e bankave nuk ka asgjë për të marrë. Duke shkulur automatet. Ato janë në shërbim të të gjithëve. Do nxjerrim paketën e masave, por ne do të fillojmë profilin e gjithësecilit që ushtron dhunë. Do i zbulojmë ata me kapuç, përmes syrit të teknologjisë. Është informacion për ata që janë me dhunën në mend”, theksoi ai.