Burime brenda Komitetit Teknik, bëjnë me dije se është hedhur ideja për karantinë 2 javore, për shkak të situatës së përkeqësuar të Covid në vend.
Por ende nuk dihet nëse do arrihet në vendimin për shtrëngimin e masave, të cilat do t’i mësojmë me shumë gjasa ditën e nesërme nga Ministria e Shëndetësisë.
Një nga kërkesat e Komitetit Teknik, është vendosja e karantinës në fundjavë, me ditët e shtunë dhe të diela, ose
zgjatja e orës policore me 2 orë të tjera, pra mbyllja të nis në orën 18:00 të mbrëmjes deri në orën 06:00 të mëngjesit.
Por kërkesat e Komitetit të Ekspertëve kanë hasur shpesh pengesën e “Komitetit të Kompetentëve”, më saktë qeverisë dhe kryeministrit Edi Rama, i cili është gjithmonë kundër shtrëngimit të masave anti-Covid, jo sepse “ngordh” nga dashuria për popullin dhe bizneset, po ka frikë mos “ngordh” populli dhe biznesi që nuk e paguan dot, po t’ia shtrëngoj lakun në fyt.
Në fakt masat nga Komiteti i Ekspertëve kanë qenë gjithmonë të duhurat sipas protokolleve, sepse asnjëri prej tyre nuk kërkon vota nga elektorati, por kërkon sa më pak pacientë dhe humbje jete në shtretërit e tyre.
Mirëpo kjo nuk ndodh me “Komitetin e Kompetentëve”, i cili me stilin “tërhiq por mos e këput” duke e mbajtur gjysëm hapur dyert e karantinës, kërkon vota në prag zgjedhjesh… të mos paguaj asnjë kacidhe për biznesin dhe të papunët që po lëngojnë prej gati 1 viti tashmë… dhe të ulë numrin e të prekurëve dhe të jetëve të humbura nga virusi.
Praktikisht mjeku Tritan Kalo kishte të drejtë kur thoshte se: “Të vërtetat shpesh bishtnohen, sepse ato janë “pak të idhta… Komiteti këshillon, por Ekzekutivi vendos…”
“Bëhet fjalë për një Komitet KËSHILLIMOR dhe jo VENDIM-MARËS sikundër pothuajse përditë abuzohet nga ekzekutivi dhe opozita….Këshillat e udhëzimet e këtij Komiteti që funksionon mbi bazat e VULLNETARIZMIT, më pas diskutohen e kalojnë filtrin ligjor, pëpara se mbi bazën e tyre të meren VENDIME nga EKZEKUTIVI…Ndaj duhet përfundimisht të kihet e qartë prej kujtëdo se, Komiteti këshillon, Ekzekutivi vendos… MOS ABUZONI me togfjalëshin se “Komiteti i Ekspertëve vendosi që…” Jepini Çezarit atë që i përket atij… E thënë shkurtazi e qartazi… Together forever!!!”, shkruante Kalo.
Komiteti i Ekspertëve sipas burimeve kërkon karantinë, “Komiteti i Kompetentëve” kërkon mos ashpërsim të masave. Le të shohim nesër kush do të fitoj!
Shkak për masat ekstreme është zinxhiri i transmetimit të Covid-19, ku Shqipëria po përballet me shifra të larta infektimesh në javën e fundit. Vendi ynë ka kapur pikun e infektimeve dhe humbjeve të jetës dhe përqindja e shtrimeve spitalore është shtuar ndjeshëm nga muaji i kaluar./Ekskluzive.al
