Zgjedhjet e 25 prillit rrezikojnë seriozisht pasi Komisioni Qendror i Zgjedhjeve mund të mos ketë prodhuar në kohë fletët e votimit. Kompania që ka fituar tenderin për të prodhuar fletët e votimit, i është drejtuar me një letër Komisionit Qendror të Zgjedhjeve.
Në letër bëhet me dije se nga ana e kompanisë duhet kohë për të bërë të mundur printimin e fletës. Kompania sllovene CETIS sqaron se për prodhimin e fletës së votimit koha prej 10 ditësh e vendosur është e pamjaftueshme. “Këto procese zakonisht zgjasin një ditë pune.
Pasi të jetë bërë gjithçka dhe të fillojë prodhimi, vetë prodhimi i fletëve të votimit kërkon kohë dhe kjo ndryshon nga projekti në projekt dhe varet gjithashtu nga disa faktorë të jashtëm. Printimi në vetvete i 3.6 milionë fletë votimi me përafërsi merr 14 ditë pune dhe vijimësia e procesit të printimit varet nga prodhimi. Ne mbërrijmë në konkluzionin se fleta e votimit me përmasat të cilat ne kemi parë do të duhet për t’u printuar më shumë se 20 ditë, në mënyrë që të përfundojmë me sukses të gjithë numrin e kërkuar dhe në fund duhet t’i shtojmë edhe 2 ditë të tjera për t’i dorëzuar këto në qendrat e votimit nga KQZ”, thuhet në letrën dërguar KQZ.
Një tjetër pengesë sipas kompanisë janë edhe përmasat e fletës së votimit, ku kompania shprehet se nëse fleta e votimit do të përcaktohet me formatin 297 x 600, atëherë do të duhen edhe 2 deri në 3 javë të tjera kohë, pasi ky format do më shumë kohë në shtypjen edhe printimin.
Kompania shprehet se ata ishin të përgatitur në kornizën kohore të përmendur të prodhimit kur të gjitha fletët e votimit përveç Tiranës do të jenë format standard A3 (297 x 420). “Ne kemi blerë material letre sipas dokumentacionit tuaj të tenderit, dhe të gjitha faktet e lartpërmendura në lidhje me afatet e prodhimit janë llogaritur në këto terma. Formati më i gjatë A3 është konsideruar vetëm për rajonin e Tiranës.
Nëse të gjitha mutacionet do të kishin këtë format më të gjatë, 297 x 600, atëherë të paktën 2 deri në 3 javë janë të nevojshme për porositjen e letrës materiale dhe kohët e prodhimit do të jenë shumë më të gjata se sa përshkruhen më lart, pasi formatet e pastandardizuara shkaktojnë shumë më ngadalë kohët e shtypjes në makinë. Prandaj, ne jemi të përgatitur në kornizën kohore të përmendur të prodhimit kur të gjitha fletët e votimit përveç Tiranës do të jenë format standard A3 (297 x 420)”, bëhet më dije në letër.
Përplasjet mes partive
Përplasjet midis Partisë Socialiste dhe Partisë Demokratike pak ditë më parë në Komisionin Qendror të Zgjedhjeve sollën edhe vonesat për fletën e votimit. Dy partitë vendosën që të ankimojnë në KAS vendimin për fletën e votimit. Kjo pasi Partia Demokratike preferonte vendosjen e emrave në mënyrë vertikale, ndërsa Partia Socialiste dëshironte që deputetët në fletët e votimit të identifikohen me numra dhe jo me emrat e tyre.
Ishte Partia Demokratike ajo e cila ankimoi vendimin në Kolegjin Zgjedhor, pasi KAS rrëzoi kërkesën e PD-së që fleta e votimit të jetë me numra dhe emra, por të renditura në mënyra vertikale dhe jo horizontale. Sakaq, Komisioni i Ankimimit dhe Sanksioneve në KQZ pranoi kërkesën e Partisë Socialiste duke rrëzuar propozimin e Komisionerit Shtetëror të Zgjedhjeve Ilirjan Celibashi për fletën e votimit. Fleta e votimit me emra u propozua nga Ilirjan Celibashi, por më pas u ankimua nga 2 forcat kryesore politike. / SIDORELA BRAÇJA