Teksa aksi Murriqan-Lezhë ka risjellë në vëmendje ndërtimin e Korridorit Adriatiko-Jonian, ecuria e segmenteve të këtij projekti në vendin tonë është në faza të ndryshme. I njohur ndryshe dhe si Korridori Blu, në territorin shqiptar gjatësia totale e tij është 315 km dhe nis nga Kakavija, në Gjirokastër, deri në Murriqan, ku bëhet lidhja me Malin e Zi.
Në vitet e fundit përpjekjet për ndërtimin e kësaj rruge janë përqëndruar për segementet nga Fieri në Murriqan, që kanë një gjatësi totale prej 188 km. Kështu, Murriqan – Balldren është në fazën e hartimit të projektit të detajuar, ndërsa në vazhdim të këtij segmenti është aksi Milot – Balldren, për të cilin është shpallur kompania fituese, ndërsa aktualisht janë duke përfunduar negociatat për finalizimin dhe nënshkrimin e kontratës së partneritetit publik – privat.
Më pas vazhdohet me aksin Milot – Fier, i cili është i ndarë në segmentet Milot-Thumanë, Thumanë-Kashar, Kashar-Lekaj dhe Lekaj-Fier. Aktualisht, segmenti më i avancuar është Thumanë–Kashar, me gjatësi 21 km, ku punimet kanë përfunduar dhe aksi është hapur për qarkullimin e automjeteve. Për tre segmentet e tjera janë lidhur kontratat koncesionare 35-vjeçare. Milot–Thumanë, me gjatësi 13.5 km, teksa projekti parashikon ndërhyrjen në gjurmën ekzistuese dhe përmirësimin e saj sipas standardeve të kategorisë A. Për Kashar–Lekaj, fitues është shpallur bashkimi i 7 operatorëve ekonomikë, ndërsa gjithë gjurma e këtij seksioni arrin në rreth 33.6 km. Gjithsesi, vetëm 26.6 km janë objekt i kontratës koncesionare, pasi rreth 7 km përkojnë me Bypass-in e Tiranës për të cilin tashmë kanë nisur punimet.
Pas Fierit, korridori parashikohet të vijojë nga zona e Levanit drejt Poçemit, Memaliajt, zonës së Tepelenës dhe Gjirokastrës, për të përfunduar në Kakavijë, në kufirin me Greqinë. Në dokumentet e planifikimit, kjo pjesë është ndarë në disa segmente, përfshirë bypass-in e Gjirokastrës dhe lidhjen Gjirokastër – Kakavijë. Ndryshe nga segmentet në veri të Fierit për këtë pjesë nuk janë ndërmarrë ende procedura tenderuese.
Korridorit Adriatiko- Jonian është pjesë e Korridorit TEN-T Mesdhetar dhe ka një gjatësi totale prej 1,550 km, teksa 20% e gjatësisë së tij kalon në territorin shqiptar.