Kryeministri Rama tha se nëse nuk do të ketë një valë tjetër në shtator, atëherë në fund të vitit do të kemi rezultat ekonomik dhe financiar sipas parashikimit, më mirë se në 2019.
“Rezistencë deri në kalimin, uroj me sukses, të sezonit turistik. Nga shtatori nëse nuk kemi ndonjë valë tjetër, do të mbledhim të gjitha forcat e do të marrim vrullin e nevojshëm. Në fund të vitit do të kemi rezultat ekonomik dhe financiar sipas parashikimit, më mirë se në fund të vit të kaluar. Vitin e ardhshëm do bëjmë një histori suksesi”.
Në daljen publike “online” në “Facebook”, drejtuar popullit dhe për t’iu përgjigjur pyetjeve dhe interesave të tyre për situatën, kryeministri Rama foli dhe për turizmin, një temë me tepër kuriozitet edhe prej sezonit veror që po afron.
Kryeministri Edi Rama tha se ky do të jetë viti i turizmit të shqiptarëve, pasi qeveria po përpiqet të hapë të gjitha rrugët për bashkëkombasit kudo që ata jetojnë.
Kryeministri Rama kujtoi se turizmi këtë vit do të ketë limite dhe do të jetë me protokolle sigurie shëndetësore, ndaj edhe shqiptarët duhet të zbatojnë rregullat.
Gjithashtu ai foli lidhur me ankesat dhe ironitë se “pse vijojnë ende të mbeten në fuqi fashat e orare, sikur koronavirusi nuk infekton me orar” ka sqaruar se e gjitha kjo bëhet për të dekurajuar lëvizjet e kota.
“Do të mbetemi besnik të numrave në përcaktimin e zonave të gjelbra. Komiteti i ekspertëve sheh numrat, dhe modeli i zonat e të kuqe nuk bazohet vetëm të numrat, por dhe të shumë të tjera. nuk është çudi që një zonë e gjelbër të rikthehet e kuqe, por edhe e kundërta.
Pak hapemi, se këto numra janë prodhuar nga ndikimet e 10-12 ditëve të fundit, jo të 5-6 ditëve të fundit. Pak hapemi dhe numrat fillojnë të rritet. Kjo është reale, nuk është një lojë,një farsë. Në kushtet e zonës së kuqe do vazhdojmë të kemi kufizime.
Më pyesin pse mbahen fashat e orarit…ato kanë rol në dekurajimin e daljeve të tepërta që nuk janë të domosdoshme. Nëse nuk kemi fashën orare, i bie që në një zonë të kuqe si në një zonë të gjelbër, baret të jenë hapur. Kufizimi i daljeve në fundjavë është dashur dhe duhet për këtë”, tha Rama.
Lidhur me transportin ndërqytetas me autobusë dhe furgonë për të bërë lëvizjen e njerëzve nëpër qytete, kryeministri Rama tha se për momentin ky shërbim nuk mund të ofrohet.
“Hapja e autobusëve është si t’i ofrosh virusit të udhëtojë e të shëtisë shpëti më shtëpi”.
Lidhur me këtë shërbim, kryeministri tha se kjo ndalesë është në një farë mënyre edhe një mundësi e mirë reformimi në transportin publik, për të ofruar një shërbim më të mirë për qytetarët.
“Bëni durim, sepse ky shërbim është një problem i madh në këto kushte që flasim”, -tha kryeministri Rama.