Shtyhet për datën 22 prill seanca për Adriatik Llallën. Shkak i shtyrjes së seancës është bërë fakti se duhen njoftuar dëshmitarët e Prokurorisë, që seanca për Llallën kalon në fazën e pyetjes së dëshmitarëve.
Kujtojmë se, procesi gjyqësor për ish Prokurorin e Përgjithshëm Adriatik Llalla do të nisë nga e para, pasi ky i fundit kërkoi disa ditë më parë të revokohet gjykimi i shkurtuar.
Llalla kërkoi zhvillimin normal të procesit në mënyrë që ai të kishte mundësinë e paraqitjes së provave të reja.
Kjo kthesë, erdhi pikërisht ndërsa pritej që ish Prokurori i Përgjithshëm të paraqiste mbrojtjen e tij, dhe gjykata të dilte më pas me një vendim.
Prokuroria e Posaçme kundër Korrupsionit dhe Krimit të Organizuar, SPAK, kishte kërkuar dënimin me dy vjet burgim, që për shkak të gjykimit të shkurtuar reduktohej me 1 vit e 4 muaj, si dhe 5 vjet përjashtim nga funksionet publike, për ish Prokurorin e Përgjithshëm.
Zoti Llalla ishte dyshuar fillimisht për katër vepra penale, por në përfundim të hetimit, SPAK ngriti ndaj tij vetëm akuzën për “fshehje dhe mosdeklarim të pasurisë”, e konsideruar më shumti një kundravajtje penale që dënohet nga gjobë deri në 3 vjet burgim.
Zoti Llalla u largua nga detyra në përfundim të mandatit në dhjetor të vitit 2017. Pak muaj më pas, Departamenti Amerikan i Shtetit njoftoi se i kishte ndaluar atij dhe familjes së tij, hyrjen në SHBA, për shkak të përfshirjes së ish zyrtarit shqiptar në raste të mëdha korrupsioni.
