Arben Kraja ka deklaruar se SPAK nuk e ndjen presionin e politikës, por është koha që ta tregojë me vepra dhe ky është momenti që edhe vetë Arben Kraja të ‘çlirohet’ nga e kaluara si drejtor i antikorrupsionit në qeverinë e Ilir Metës në fillim të viteve 2000. Madje ai sot mori dhe një shuplakë nga Eskobar, pas deklarimit nga ana e tij se shpallja non grata nuk ishte provë për tu hetuar Berisha, sepse ishte thjesht një deklarat politike e DASH dhe ne… pra SPAK, merret vetëm me kallzime penale.
Sot Zëvendës-Ndihmës Sekretari i Shtetit për Evropën dhe Euroazinë, Gabriel Escobar u ka bërë thirrje institucioneve shqiptare që ta shqyrtojnë ‘Non Gratën’ e Sali Berishës, pasi vendimi është i bazuar në fakte dhe prova. Në ndryshim nga sa Sali Berisha po përpiqet që ta paraqesë para demokratëve, se shpallja e tij ‘Non Grata’ ka ardhur si pasojë e ndikimit të George Soros, por edhe si faj i ambasadores Yuri Kim, Escobar e ka bërë të qartë se nuk është një vendim individual dhe as politik. Futja Berishës në listën e zezë, ka sqaruar Escobar, ka ardhur për shkak të korrupsionit që kanë zbuluar e që mban “vulën” e Sali Berishës.
“Vendimi për ta përcaktuar atë ishte një vendim institucional. Nuk ishte një vendim individual dhe nuk ishte një vendim politik. Ishte një vendim që ne e morrëm për shkak të korrupsionit që gjetëm. Unë do t’u bëja thirrje institucioneve në Shqipëri ta shqyrtojnë këtë. Por dua të them, se ne ende kemi partnerë të mirë në Partinë Demokratike, ne duam që Partia Demokratike të jetë një kontribues i fortë dhe i rëndësishëm i stabilitetit politik në Shqipëri. Unë do t’u bëja thirrje mbështetësve të Partisë Demokratike të mendojnë për imazhin që përcjellin, nëse do të kishin në krye njerëz, që janë përcaktuar nga Sekretari i Shtetit për korrupsion”, tha Escobar për Zërin e Amerikës.
Sa i takon deklaratave të ambasadores Yuri Kim, Zv/Ndihmës Sekretari thekson se ajo që bën diplomatja amerikane në Shqipëri është në bashkëpunim të ngushtë me Departamentin e Shtetit, pra nuk janë qëndrime individuale të saj.
“Ajo që bën ambasadorja jonë atje është shumë përfituese për Shqipërinë. Ajo është personi kryesor për marrëdhëniet dypalëshe. Gjithshka që ajo bën, është në bashkëpunim shumë të ngushtë me Departamentin e Shtetit. Këto nuk janë qëndrime individuale, janë qëndrime institucionale. Dhe duhet të theksoj se çështjet e korrupsionit, çështjet e krimit të organizuar, kanë prekur gjithë rajonin, jo vetëm Shqipërinë, pra është e rëndësishme që të bashkëpunojmë për t’iu kundërvënë këtyre kërcënimeve”, shtoi ai.
Ndërkohë, sa i përket amnistisë fiskale, për të cilën qeveria shqiptare këmbëngul se do e miratojë, Escobar ka shprehur rezerva.
“Po edhe ne kemi disa shqetësime. I kemi diskutuar ato me qeverinë e Shqipërisë. Do t’i bëja thirrje qeverisë së Shqipërisë t’i dëgjojë këto zëra dhe ta përshtasë qasjen ndaj amnistisë fiskale që të jetë në përputhje me standardet globale dhe me kërkesat e BE-së”, tha Escobar.
Në fund, Escobar vlerësoi marrëdhënien diplomatike me Shqipërinë, duke thënë se është bërë një partner shumë i besueshëm për Shtetet e Bashkuara dhe se luan një rol të rëndësishëm për stabilitetin rajonal dhe atë në Evropë.