Me ardhjen e zgjedhjeve lokale nuk ka mbetur bashki në vend që nga më e madhja e deri tek më e vogla pa shfrytëzuar rastin.
Me qindra tendera me shifra të majme janë organziuar këto kohë nga këto institucione lokale vetëm e vetëm që të kënaqin sa më mirë xhepat e atyre që mund të sigurojnë vota në favor të tyre.
Interesant është fakti se përveç bashkive, zgjedhjet i ka shfrytëzuar mjaft mirë edhe Celibashi i KQZ për të bërë një dorë të mirë me para. I tillë duket edhe rasti i tenderit që po ju paraqesim sot.
Celibashi ka organizuar një tender “fshehtas” për blerje vulash (kode) sigurie për zgjedhjet.
Themi fshehtas pasi procedura e tenderit është e tipit me negocim, pa njoftim. Pra askush nuk ka patur informacion përveç vetë Celibashit të KQZ dhe natyrisht firmave pjesëmarrëse.
Më konkretisht bëhet fjalë për tenderin me numër reference REF-60389-02-24-2023 dhe me objekt “Blerje vula (kode) sigurie për zgjedhjet e vitit 2023” për një fond limit prej 75,218,000 lekë të reja pa TVSH ose rreth 900 milionë lekë të vjetra me TVSH.
Fituese e këtij tenderi me negocim dhe pa njoftim është shpallur firma Farma Net Albania e Sokol Topçiut. Ky i fundit ka marrë miliarda lekë tendera nga institucionet shëndetësore por si duket ka filluar të përfshihet edhe me zgjedhjet.
Oferta e tij ka qenë 72,031,300 lekë të reja pa TVSH ose rreth 865 milionë lekë të vjetra me TVSH. Kjo vlerë po të krahasohet me vlerën e fondit limit, rezulton të jetë sa 95.76% e tij duke ngritur dyshime se kemi të bëjmë me një fitues të paracaktuar.
Epo, shpresojmë se me vulat e sigurisë së Sokol Topçiut siguria e zgjedhjeve lokale të 2023 do të jetë në “duar të sigurta”. (JOQ)
Kujtojmë që Celibashi është kunati i Fatmir Mediut. Mes kunetërve pati një krisje, kur Celibashi mësoi se gruaja e tij Ardiana Mediu ishte në makinë me Sokol Olldashin natën e aksidentit fatal, të 20 nëntorit 2013.
Celibashi dha dorëheqjen si ministër i qeverisë Rama për të reflektuar. Çifti u pajtua pasi në mes ishin edhe shumë para, fije politike dhe interesa.
Nga ana tjetër, Sokol Topçiu, i arrestuar për trafik ilaçesh, njihet si njeriu që shëtit në jaht ministren Manastirliu, ndërsa kjo e fundit ka kaluar miliona euro në llogaritë e Topçiut me tendera klientelistë.
Topçiu ka pasion edhe fluturimet.
Ka dyshime se letrat e tenderave i kopsit ‘ujku i vjetër’ Genc Ruli, i cili ka qenë më parë shef i burrit të Manastirliut. Kjo e fundit i ka fshehur pasuritë e korrupsionit në emrin e të vëllait, për të cilin do të flasim në vijim.
