Futbolli elitar italian vijoi këtë të diel me ndeshjet e radhës për raundin e 15-të. Te tri pikët doli Fiorentina dhe Empoli, me Alen Sherrin dhe Ardian Ismajlin që luajtën minutat e plota. Ndërkohë që Lazio fitoi 0-1 në udhëtim me Napolin, duke ‘tërbuar’ djemtë e Contes dhe duke i lënë në vendin e dytë të renditjes. Atalanta kryeson kampionatin.
Lazio është kthyer në makthin e Napolit. Pasi disa ditë më parë i eliminoi nga Kupa e Italisë, këtë të diel Lazio fitoi 0-1 në Napoli për kampionat, duke bërë që skuadra e Contes mos jetë më në krye të Serie A, pozicion që mbahet nga Atalanta. Në “Diego Maradona” mjaftoi goli i Isaksen në minutën e 79-të për të ulur në gjunjë vendasit, ndërkohë që Lazio merr vendin e pestë me 31 pikë, duke lënë pas Juventusin.
Në “Artemio Franchi” të Firenzes, vendasit e Fiorentinës fituan 1-0 kundër Cagliarit. Goli i Danilo Cataldit në minutën e 24 vendosi tri pikët për ‘Violat’, që këtë sezon janë një surprizë e bukur në Serie A. Për sardët nga minuta e parë në portë luajti Alen Sherri, me shkodranin që ka fituar vendin mes shtyllave dhe u vlerësua me notën 6,4. Fiorentina me këtë tri pikësh ngjitet në vendin e katërt me 31 pikë. Cagliari me 14 pikë mbetet në vendin e 15-të.
Në stadiumin “Marc’Antonio Bentegodi” vendasit e Veronës u thyen keq 1-4 nga Empoli i Ardian Ismajlit. Mbrojtësi i Kombëtares luajti për të disatën herë me shiritin e kapitenit në krah, duke qenë mes më të mirëve në fushë. Sebastiano Esposito me dopietë, Cacace dhe Colombo shënuan për miqtë, teksa përkohësisht shkurtoi Tengstedt.
Serie A, raundi 15-të:
E diel, 08 dhjetor 2024
12:30 Fiorentina 1-0 Cagliari
15:00 Verona 1-4 Empoli
18:00 Venezia 2-2 Como
20:45 Napoli 0-1 Lazio
