Në një intervistë për emisionin “Albania NewsCast” me gazetarin Arbër Hitaj, historiani dhe analisti Arben Llalla ka bërë deklarata të forta lidhur me ndikimin e rrymave politike greke mbi partitë kryesore politike në Shqipëri, Partinë Socialiste dhe Partinë Demokratike.
Sipas Llallës, ndonëse të dyja krahasët e politikës kanë pasur bashkëpunime apo kontakte me Athinën, qasja e tyre ka qenë rrënjësisht e ndryshme në pragmatizëm dhe diplomaci.
PS dhe diplomacia e brezit të vjetër
Historiani u shpreh se Partia Socialiste në fillimet e saj ka bashkëpunuar me rryma të caktuara në Greqi, por sipas tij, politikanët e saj kanë treguar më shumë maturi dhe pjekuri diplomatike.
Në këtë kuadër, ai veçoi figura të njohura si Servet Pëllumb, Gramoz Ruçi, Dritëro Agolli e Sabit Brokaj, ndërsa vlerësoi veçanërisht rolin e ish-kryeministrit Fatos Nano. Llalla e cilësoi Nanon si një “politikan klasi” dhe “gentleman”, i cili dini të ruante ekuilibrat dhe të largohej me dinjitet kur shikonte pengesa në rrugëtimin e tij politik.
PD dhe varësia ndaj Athinës
Nga ana tjetër, Arben Llalla hodhi akuza të drejtpërdrejta ndaj Partisë Demokratike, duke e cilësuar qasjen e saj si një “luftë të hapur pro-greke”. Sipas tij, një pjesë e madhe e strukturës drejtuese të kësaj force politike ndodhet nën ndikimin e drejtpërdrejtë të Athinës.
“Tetëdhjetë për qind e PD-së komandohet nga grekët,” deklaroi Llalla gjatë bisedës me gazetarin Arbër Hitaj.
Më tej, ai ndaloi edhe te figura e ish-kryeministrit Sali Berisha, duke pohuar se ai ndjen pasiguri dhe presion nga ky ndikim. Llalla zbuloi detaje personale nga njohja me të, duke kujtuar se në vitin 2003 ka qenë vetë ai një nga personat që i ka mundësuar Berishës realizimin e disa takimeve politike në Greqi.
Deklaratat e historianit Llalla në “Albania NewsCast” hapin sërish debatin mbi prapaskenat e marrëdhënieve të politikës shqiptare me fqinjin jugor dhe shkallën e ndikimit të jashtëm në vendimmarrjen e partive kryesore në Tiranë.