Ministrja e Shtetit për Mbrojtjen e Sipërmarrjes, Edona Bilali, ka replikuar në fundjavë me kreun e Dhomës Amerikane të Tregtisë, pasi ky i fundit ka deklaruar se Shqipëria nuk është mikpritëse me të huajt që duan të bëjnë biznes.
Ministrja Bilali e nis replikën duke i kujtuar se para 4 ditësh kreu i kësaj dhome shprehej i kënaqur që janë 3 fishuar investimet amerikane në vend. Ndërsa pas raportit te DASH, ndryshon qëndrim. Ajo thotë se ndjen keqardhje se si një bashkëqytetar shqiptar si Kreu i Dhomës Amerikane të Tregtisë (Enio Jaço), ndikojnë për keq në perceptimin për Shqipërinë.
“Drejtuesi i AmCham, para 4 ditësh (vetëm pasi u publikuan statistika me shifra) pohon dhe shprehet i kënaqur që janë 3-fishuar investimet amerikane në vend. 3 ditë me vonë, pas publikimit të raportit të Departamentit të Tregtisë (i parifreskuar prej 2 vitesh), rimarrë nga DASH me disa ndryshime, shprehet që problem është klima jo-miqësore e biznesit.
Pyetja që të vjen menjëherë në mendje është: si e shpjegon drejtuesi shqiptar i AmCham (normalisht ai duhet të kontribuojë në leximin objektiv të aktualitetit në terren) faktin se amerikanët investuan 3 herë më shumë në Shqipëri për 4 vitet e fundit, ndërkohë që një seri investimesh të tjera të mëdha amerikane janë në proces përgatitjeje?!
Askush nuk i mohon këto probleme, por qysh se jam në këtë detyrë, as e kam hasur dhe as kam dëgjuar për ndonjë kompani amerikane apo europiane, që e ka penguar klima e biznesit në Shqipëri të investojë! Madje përkundrazi, kam pasur vetëm reagime shumë pozitive prej tyre për mikpritjen dhe trajtimin në Shqipëri.
Të njëjtën kam dëgjuar edhe nga kolegët e mi! Sa gjynah kur bashkëqytetarë tanët, aq më tepër në funksione te tilla ndikojnë për keq, pa asnjë fakt apo shifër, në ushqimin e perceptimeve të deformuara prej vitesh qoftë tek opinioni publik, qoftë tek miqtë dhe partnerët e huaj!
Por shyqyr, në fund mbetet si gjithnjë puna me faktet e punës, për të cilat flet sot edhe Shqipëria turistike, me të dhënat e saj mbresëlënëse,” u shpreh Bilali në rrjetet sociale.
