Mbyllja me forcë e Fakultetit të Ekonomisë/ Studentët: Kjo është dhunë dhe e turpshme

Dhjetra studentë qëndruan në oborrin e Fakultetit të Ekonomisë në Tiranë pasditen e të mërkurës të cilët donin të zhvillonin mësim dhe të merrnin shërbime në fakultet. Por studentet thane se rreth 20 studentë po pengojnë të tjerët duke bllokuar fakultetin me dhunë. Një nga studentët në degën e administrim biznesit tha se kjo është dhunë.

“U bë një njoftim për të gjithë studentët që janë pro mësimit dhe u mendua që të bëhej një diskutim , por shohim që nuk po bëhet akoma gjë dhe thjesht po presim. Një formë dhune besoj. Besoj se studentët e vërtetë nuk janë ata që duhet të bëjnë këtë.

Na duheshin disa dokumente por deri është e mbyllur dhe nuk shkojmë dot tek sekretaria”. Studenti i vitit të dytë bachelor për administrim biznes thotë se ” janë rreth 20 veta apo 15 veta. Duhet të jetë e hapur dera e fakultetit. Ka shumë veta që kanë ardhur për një vërtetim dhe dera e universitetit është mbyll me një grup studentësh”.

Një tjetër studente e këtij fakulteti tha kjo sjellje është e turpshme. “Jam studente e këtij fakulteti, viti i parë master. Unë jam një nga ato që u vendos me shumicën për bojkotin dhe do ju mbështes deri në fund, por kur pashë këtë formë që nuk lejohet pjesa tjetër, realisht është gjëja më e turpshme që mund të ndodhë.

Jo jo, të futen të gjithë studentët. Kam ardhur për të marrë shërbimin dhe nuk më lejohet të futem. Janë vërtetime dhe gjëra të tjera që duhen për punë. Studentët e vërtetë nuk kanë vendosur që të mbyllet dera. Kanë vendosur bojkotin por nuk kanë vendosur që të mbyllet dera”.

Një tjetër student. “Jam kundër mbylljes sidomos për ata që duan të marrin shërbime të tjera përveçse mësimit. Dua të marr disa dokumente si vërtetim studenti dhe listë notash”.