Ilir Meta dhe Sali Berisha duket se kanë varur shpresat tek rikthimi i Donald Trump në krye të Shtëpisë së Bardhë për të dalë nga lista e zezë e Shteteve të Bashkuara të Amerikës.
Me zgjedhjen e Joe Biden si president i SHBA, ish-kryeministri Berisha dhe familja e tij u shpallën “non grata” në 19 maj të këtij viti, ndërkohë që presidenti Meta u përplas publikisht me ambasadoren amerikanë në Tiranë, Yuri Kim.
Nisur nga të gjitha këto zhvillime, sinjalet janë se demokratët nuk mbështesin politikën e dyshes Meta-Basha dhe për këtë arsye këta të fundit i kanë varur shpresat tek rikthimi i republikanëve në pushtet.
Sinjalet e dhëna
Ajo që vihet re është fakti se kreu i shtetit dhe ish-lideri demokrat, kanë futur mik ish-ambasadorin amerikan në Gjermani dhe të dërguarin e administratës amerikane në dialogun midis Kosovës dhe Serbisë, diplomatin Richard Grenell për të fituar simpatinë e ish-presidentit Donald Trump.
Ky i fundit ka vlerësuar këtë fundjave diplomatin Grenell me çmimin “Game Changer” (njeriu që ndryshon lojën), si bashkëpunëtorin e tij të shkëlqyer, njeri me guxim të madh dhe një zëdhënës i mirë për të gjithë amerikanët, ndërsa media pranë Berishës e kanë promovuar tej mase këtë lajm. Sipas tyre, kjo deklaratë e Trump vjen në një moment kur janë shtuar zërat se ai do të kandidojë sërish në garën për President të SHBA-ve në vitin 2024.
Po ashtu mediat e Metës dhe Berishës janë shprehur dje se sondazhet e fundit japin një epërsi të Trump kundrejt Joe Biden, me 2 pikë më shumë. Pra duket se Meta-Berisha po luten që Trump të rikandidojë dhe të fitojë në zgjedhje. Pra, këto lëvizje tregojnë se binomi Berisha-Meta ia kanë besuar negociatat diplomatit Grenell, në mënyrë që ky i fundit të lobojë pranë ish-presidentit Trump, që në rast se ai vjen në krye të Shtëpisë së Bardhe, të zhbëjë vendimin e shpalljes “non grata” për ish-kryeministrin nga Sekretari Amerikan i Shtetit, Antony Blinken dhe heq emrin e presidentit shqiptar nga lista e zezë e SHBA.
Madje, fakti që tregon se Grenell është një mik i dyshes Meta-Berisha, shihet qartë edhe në lëvizjet dhe deklaratat e bëra kohët e fundit nga ish-ambasadori amerikan në Berlin. Pas zgjedhjeve të 25 prillit, Grenell erdhi për një vizitë në Shqipëri, ndërsa takoi presidentin Meta dhe sulmoi shefin e Departamentit Amerikan të Shtetit për shpalljen person i padëshiruar për ish-kreun e Partisë Demokratike. Ndërkohë dje i ka dalë në krah Berishës.
Sulmet e Grenell ndaj Blinken
Ish i dërguari i SHBA për dialogun Kosovë-Serbi, Richard Grenell e ka kritikuar ashpër edhe këtë fundjave Sekretarin e Shtetit Antony Blinken pas vendimit për shpalljen e ish-kryeministrit Sali Berisha “non grata”. Në një shkrim të gjatë në rrjetet sociale, teksa analizon marrëdhënien e Blinken me manjatin George Soros, Grenell e konsideron vendimin e Blinken si ndërhyrje në politikën shqiptare, ndërsa akuzon DASH se nuk ka asnjë provë për Sali Berishën.
Madje, Grenell thekson se mbështetja financiare që Soros i jep Blinken dhe familjes së tij, përkthehet nga ky i fundit në sanksione që ndalojnë udhëtimet drejt SHBA të kundërshtarëve të manjatit amerikan, sikundër është zoti Berisha./ Rigels Seliman
