Marrëdhëniet mes Qeverisë dhe Presidencës duket se po përkeqësohen nga dita në ditë. Edhe pse në daljet e tyre publike Presidenti i Republikës, Ilir Meta dhe kryeministri Edi Rama kanë qenë mjaft të rezervuar, në të vërtetë ka nisur një luftë në distancë mes tyre. Ilir Meta ka sfiduar mbi 6 herë qeverinë, duke bllokuar nismat e saj. E para ka të bëjë me institucionin e Shërbimit Informativ Shtetëror. Fiks një vit më parë ish-kreu i SHISH, Visho Ajazi Lika dha dorëheqjen nga ky institucion. Dhe kryeministri Edi Rama i propozoi Metës, Helidon Bendon që ta dekretojë si kreun e ri të Shërbimit Informativ Shtetëror.
Por, sot kur bëhet plot një vit nga kërkesa e Ramës, Meta ende nuk e ka dekretuar Bendon, duke e lënë SHISH pa titullar. Një tjetër tregues i përplasjeve Rama-Meta janë kthimi mbrapsht i katër ligjeve që mazhoranca i ka dërguar Presidentit për t’i dekretuar. Dy prej tyre kanë të bëjnë me teatrin, pasi Meta ktheu dy herë nismën për shembjen e godinës. Ligji tjetër që Meta nuk ka dekretuar ende është ai i Tatimit mbi Lojërat e Fatit. Ndërsa një tjetër ligj që nuk ka marrë “bekimin” e Metës duke mos u dekretuar është ai për Tarifat Gjyqësore.
Por një përplasje e fortë ka ndodhur dhe me kreun e Kuvendit, Gramoz Ruçi. Që në gusht ky i fundit i kërkoi Metës që të hedhë shortin për Këshillin e Emërimeve në Drejtësi dhe Meta e refuzoi. Sot KED është me 4 anëtarë dhe kreu i shtetit ende nuk i ka marrë parasysh kërkesat e Ruçit. Nisma tjetër që Meta i ka refuzuar qeverisë është ajo e paktit të detit.
Çështja e detit
Qeveria shqiptare dhe ajo greke ranë dakord mes tyre që të negociojnë kufirin detar. Në shkurt ministri i Jashtëm Ditmir Bushati ju drejtua me një kërkesë Metës, ku kërkonte autorizimin për nisjen e bisedimeve. Meta e zvarriti procesin për 3 muaj. Pasi ja dha autorizimin Bushtit, negociatat vijuan në nivel ekspertësh dhe momentalisht është arritur në një draft-marrëveshje. Por kjo marrëveshje ka që në korrik në zyrën e Metës dhe kreu i shtetit nuk po e firmos. Burime të sigurta pranë Presidencës bënë me dije se Ilir Meta ka pasur sherr me ministrin e Jashtëm, Ditmir Bushatin dhe ka kërkuar të negociojë vetëm me kryeministrin Edi Rama.
Pra, në një farë mënyre Meta kërkon që kryeministri Edi Rama t’i “lutet” atij, por Rama e ka shpërfillur. Edhe në deklarimet e ditëve të fundit Meta e ka treguar hapur se ai bisedon vetëm me Ramën për këtë çështje, duke nxjerrë jashtë loje Bushatin. Vetë kryeministri duket se po e injoron dhe kjo po sjell vonesa.
Përplasja për BSH e KLSH
Mirëpo, në ditët në vijim pritet që të agravohet më shumë përplasja Qeveri-Presidencë, pasi Ilir Meta duhet të bashkëpunojmë me kryeministrin Edi Rama. Bëhet fjalë për drejtuesit e dy institucioneve kyçe, siç janë Kontrolli i Lartë i Shtetit dhe Banka e Shqipërisë. Kreut të KLSH, Bujar Leskaj i mbaron mandati në dhjetor, ndërsa është hapur gara për drejtuesin e ri.
Ndërsa Guvernatorit Genc Sejko i mbaron mandati në nëntor. Sipas ligjit, emrat për kreun e ri të Kontrollit të Lartë të Shtetit dhe Guvernatorit të Bankës së Shqipërisë i propozon Presidenti i Republikës, ndërsa më pas është mazhoranca ajo që vendos nëse do të pranojë të votojë kandidaturat e propozuara nga Meta apo jo. Kështu që duke qenë se Meta do të nxjerrë kandidatura pranë tij për kreun e ri të KLSH dhe BSH, mbetet të shihet nëse shumica socialiste do t’i votojë ose jo. /Rigels Seliman
