Ministri i Jashtëm Ditmir Bushati i ka kthyer përgjigje të menjëhershme kreut të shtetit Ilir Meta, i cili tha se vendimi i Gjykatës Kushtetuese i vitit 2010 është vija e kuqe për të gjithë dhe nëse Qeverisë nuk i pëlqën ky vendim, mund ta ankimojë. Përmes një deklarate zëdhënësja e ministrisë për Evropën dhe Punët e Jashtme, sqaron se, “Procesi i nisur me Greqinë është kompleks, ndaj kërkon qetësi, maturi, institucionalizëm dhe jo projektimin e një anormaliteti që nuk ekziston.”
Ja teksti i plotë i deklarates:
Deklaratë e zëdhënësit të ministrisë për Evropën dhe Punët e Jashtme
Në përgjigje të intersimit të mediave, këshilltari i komunikimit në Ministrinë për Evropën dhe Punët e Jashtme, Edlira Prendi, dëshiron të bëje me dije se:
Ministria për Evropën dhe Punët e Jashtme po shqyrton letrën e Presidentit të Republikës, në përgjigje të kërkesës së dërguar prej saj, për lëshimin e autorizmit për fillimin e negociatave me palën greke për delimitimin e hapësirave detare mes dy vendeve.
Çështjeve të ngritura nga Presidenti i Republikës, Ministria për Evropën dhe Punët e Jashtme do t’i përgjigjet në rrugë institucionale. Sikundër Ministri për Evropën dhe Punët e Jashtme është i angazhuar për të vijuar bisedimet e konsultimet e nisura me Presidentin e Republikës për të gjitha çështjet me interes për këtë proces.
Procesi i nisur me Greqinë është kompleks, ndaj kërkon qetësi, maturi, institucionalizëm dhe jo projektimin e një anormaliteti që nuk ekziston.
