Me ardhjen në krye të Këshillit të Emërimeve në Drejtësi, Vitore Tusha duket se ka nisur rokadën brenda institucionit. Gazeta e paralajmëroi pak ditë më parë se presidenti Ilir Meta ka intensifikuar lëvizjet për të kapur Gjykatën Kushtetuese dhe reformën në drejtësi, ndërkohë që me emërimin e Vitore Tushës, KED ka nisur të ndryshojë.
Ditën e premte, në datën 10 korrik në orën 12:30 nën drejtimin e kryetares, zonjës Tusha pritet të mblidhet Këshilli i Emërimeve në Drejtësi, ndërsa bie në sy se në rendin e ditës të publikuar në faqen zyrtare të Gjykatës së Lartë pritet të ndryshohen disa rregullore dhe vendime sa i takon emërimeve në Gjykatën Kushtetuese.
“Këshilli i Emërimeve në Drejtësi (KED) njofton se ditën e premte, datë 10.07.2020, ora 12:30, thërret mbledhjen e tij të radhës, me këtë rend dite: Miratimi i procesverbaleve të mbledhjeve të Këshillit të Emërimeve në Drejtësi të datave 03.02.2020, 05.02.2020, 06.02.2020 dhe të mbledhjes së fundit të datës 30.06.2020; Shqyrtimi dhe miratimi i projektvendimit “Për disa shtesa dhe ndryshime në vendimin nr. 4, datë 11.03.2019 të Këshillit për Emërime në Drejtësi “Për procedurën e verifikimit të kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, i ndryshuar”, thuhet në njoftimin e KED. Kur KED ka nisur punën, janë miratuar një sërë rregulloresh dhe vendimesh mbi bazën e të cilave bëhet dhe emërimi i anëtarëve të Gjykatës Kushtetuese.
Në bazë të këtyre akteve bëhet pikëzimi, renditja dhe në fund përzgjedhja. Sipas njoftimit, ndryshime do të bëhen edhe në vendimin nr. 5, datë 02.04.2019 të Këshillit për Emërime në Drejtësi “Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, i ndryshuar” dhe në vendimin nr. 1, datë 08.02.2019 të Këshillit për Emërime në Drejtësi “Për miratimin e rregullores së brendshme për funksionimin e Këshillit për Emërime në Drejtësi”, i ndryshuar”. Pra sapo Tusha mori drejtimin e KED duket se po ndryshon e gjithë procedura e skanimit të kandidatëve për në Kushtetuese.
Planet e presidentit
Por fakti që zonja Vitore Tusha me ardhjen në krye të Këshillit të Emërimeve në Drejtësi do të bëjë rokadë, duke filluar nga ndryshimi i rregullores së brendshme të KED të miratuar nga ish-kryetari Ardian Dvorani, deri tek vendimet për emërimet e reja në Kushtetuese, i hap rrugën kandidatëve të Metës. Presidenca momentalisht ka të drejtën për të pasur edhe 2 përfaqësues të saj në Gjykatën Kushtetuese nga 1 që ka aktualisht dhe që është zonja Marsida Xhaferllari.
Mirëpo, në kushtet kur presidenti Ilir Meta ka dërguar dy listat e tij dhe mes tyre ka emra që janë skualifikuar më herët nga ish-kreu i Këshillit të Emërimeve në Drejtësi, Ardian Dvorani, gjasat janë që gjatë renditjes dhe pikëzimit, KED mund t’i përfshijë ata mes tre të parëve.
Vendimet e KED
Tusha e mori javën që lamë pas drejtimin e KED dhe që aty u dhanë sinjalet e para se diçka po ndryshon. Në atë mbledhje u vendos që anëtarja e Presidencës në Gjykatën Kushtetuese, Marsida Xhaferllari të analizojë raportin e Venecias. Por kjo e fundit është personi që futi në konflikt Kuvendin me Presidentin e Republikës, andaj dhe palët iu drejtuan Komisionit të Venecias për të zgjidhur ngërçin.
“KED vendosi të ngrihet një grup pune i përbërë nga anëtarja e KED Znj. Saida Dollani dhe anëtarja zëvendësuese Znj. Marsida Xhaferllari, të cilat do të punojnë intensivisht mbi pasqyrimin e rekomandimeve të bëra nga Komisioni i Venecias në Opinionin datë 19 qershor 2020”, thuhet në njoftimin e KED.