IILD ka nisur hetimet në lidhje me vendimin e Gjykatës së Tiranës e cila ka regjistruar ndryshimet statutore të bëra në Kuvendin e 11 Dhjetorit, duke legjitimuar në këtë mënyrë Komisionin e Rithemelimit. Kërkesa për nisjen e hetimit mbi vendimin e Gjykatës, në ILD është bërë nga Sekretari i Përgjithshëm i PD Gazment Bardhi.
Vendimi i marrë nga gjyqtari Agron Zhukri, i hap rrugë marrjes së drejtimit të Partisë Demokratike nga 29 anëtarët e Komisionit të Rithemelimit, i cili përmes votës së 4935 delegatëve në Kuvendin e 11 Dhjetorit shkarkoi nga postet drejtuese Lulzim Bashën, nënkryetarët, Sekretarin e Përgjithshëm dhe Kryesinë.
Me regjistrimin në gjykatë të statutit të 11 Dhjetorit, gjykata i njohu Komisionit të Rithemelimit të drejtën e rikthimit në selinë e Partisë Demokratike, si dhe vulën e simbolet e reja të miratuara në Kuvendin e tyre.
Të gjitha ndryshimet e propozuara në Kuvendin Kombëtar të mbajtur me 11 dhjetor, nga anëtarët e komisonit të rithemelimit janë pranuar si legjitime nga gjyqtari Agron Zhukri. Ky vendim njeh komisionin e rithemelimit të Berishës si drejtues të Partisë Demokratike. Për përfaqësuesin ligjor Ivi Kaso, demokratëve u kthehet logo dhe sigla.
“Sot PD zyrtarisht u kthehet demokrateve që nëpërmjet delegatëve të tyre që u mblodhën në Kuvendin e 11 dhjetorit dhe shprehën vullnetin e tyre për të miratuar statutin e ri logon dhe simbolet e reja. Ditë e madhe për të gjithë demokratët, është zyrtarizuar vullneti i demokratëve”, tha Kaso. Kasa deklaroi se vendimi i gjykatës nuk mund të ankimohet dhe ka marrë formë të prerë.
Partia demokratike më herët ka kërkuar që të njihet kuvendi i thirrur nga ish-kryetari Lulzim Basha ai i 18 dhjetorit, por për Kason pas vendimit të sotëm, kjo kërkesë nuk qëndron më.
Sot Kryetari i komanduar i PD Enkelejd Alibeaj deklaroi se deri sa të flasë gjykata, pas ankimimit dhe kallëzimit penal mbi vendimin e sotëm, institucionet e PD-së janë këto ekzistuesit. Në konferencën për media, Alibeaj tha se bashkimi i demokratëve kalon nga një akti i vetëm, simetrik, siç ndodhi me Bashën, të ndodhë dhe me Berishën.
