Pas lajmit të fundit se SHBA nuk do të bëjë më deklarata rreth zgjedhjeve dhe drejtësisë në vendet e tjera, Muli u fut në alarm.
Deri tani mbante shpresë se SPAK mund të mos niste hetimet për kontratën, pasi ishte interes amerikan që LaCivita të merrte lekët.
Tani, pas këtij vendimi, u alarmua keq.
E thirri Lelon t’ia shpjegonte si e kuptonte ai.
— Kështu siç është shkruar, është kundër nesh, i tha Lelo.
Por ne do ta shpjegojmë ndryshe.
Do t’u themi këtyre gazetarëve tanë që Shqipëria është rast i veçantë, dhe për Shqipërinë ka thënë Trumpi që ka rëndësi të shprehemi për zgjedhjet, se kemi interes strategjik Sali Berishën.
Madje do t’i themi Gimit të Puros t’i thotë shoferit që ka pasur në SHBA, që t’i thotë atij hidraulikut që i ka rregulluar lavamanin Rubios, që të thotë që në Kongres ka mbërritur një letër ku shprehet shqetësimi se opozitari Mul Noka është i rrezikuar nga bandat dhe Edi Rama, dhe duhet të shpallet interes kombëtar amerikan.
— Kjo mund të bjerë ndesh me faktin që është shpallur person kundër interesave kombëtare të Britanisë së Madhe, shtoi Muli i menduar.
— Po këtë do ta justifikojmë me një shkrim te Syri, nga Gimi i Puros.
— Domethënë, tha Muli, e vërteta është që ne shkuam për lesh, por do themi që kemi akoma shpresë te Gimi i Puros?
— Afërsisht po, i tha Lelo. Por kjo ka edhe anën pozitive.
— Çfarë, tha Muli gjithë interes?
— Amerikanët nuk do na kërkojnë më as zgjedhje të lira në PD.
Kështu që Doktori do ta ketë partinë përgjithmonë.
Harrove ç’na bënin më parë?
Që donin Lulin patjetër, na prishnin gjithë zgjedhjet në PD.
— Atëherë jemi në rregull, tha Muli i lehtësuar.
