Pas përfundimit të numërimit të votave nga Greqia, Muli u ul dhe po bënte llogaritë e deputetëve.
Nga 50 deputetë që ka “koalicioni madhështor”, 4 i ka Ilir Meta, mbeten 46.
Një Dule, 45. Një i PDIU-së, 44. Një Mediu, 43…
– D.m.th rezultati final është 83 me 43, tha Muli me zë të rënduar.
Kjo është katastrofë! Paskemi dalë më keq se më 2001.
Këtë nuk mund ta pranojmë kurrë!
– As atëherë nuk e pranuam, i kujtoi Lelo.
Por hymë në Kuvend pas gjashtë muajsh.
Tani, po nuk hymë për një javë, ua djeg Rama mandatet dhe ua jep të tjerëve që presin në radhë.
– Jo jo, tha Muli, e kam fjalën për diçka tjetër.
Më lindi një ide nga fjalët e Doktorit që tha “do t’ua bëjmë si në 2001”.
Rezultati është afërsisht njësoj. Tani duhet t’i diskreditojmë ata.
– Me sa mbaj mend unë nga 2001, tha Lelo, e vetmja gjë që ndodhi ishte që Doktori u bë aleat me Fatos Nanon dhe ndenjën krah për krah për gati dy vjet.
I bie tani të bëhet mik për kokë me Edi Ramën.
Se gjë tjetër s’ka ç’të bëjë.
– Dakord, ajo është faza e dytë, tha Muli.
Si fazë të parë, duhet ta ndalojmë Ramën të bëjë 84 deputetë.
Në Lezhë e ndalova për 50 vota.
Po kam frikë se do më ikë ndonjë nga këta shtatë të vegjël.
– Nuk besoj, tha Lelo. Çamët dhe grekët janë njerëz besnikë. Nuk tradhtojnë.
Kështu që as Mesila, as Dule nuk shkojnë.
– Po puna është që Mesila s’është çame, tha Muli.
– Edhe këta të Ilir Metës nuk tradhtojnë.
S’e kanë bërë kurrë. Vetëm Mediu mbetet.
Po qe se e fusin në burg, mandatin e merr Alimehmeti. Kështu që sigurohemi.
– D.m.th kemi interes ta fusin në burg, tha Muli me mendim të thellë.
– Pastaj, po pamë që po na e dredh Blushi, e detyrojmë të japë dorëheqje dhe e merr Meta.
– Po mbeti dhe Meta në burg, futet Dogjani.
– Keq e më keq, tha Lelo.
Më mirë mos bëjmë më llogari, se nga 43 po e çojmë në 33.
