Ditën e tërmetit shkatërrues të 26 nëntorit, Ilir Meta në daljen e parë për mediat, tha se ai e kishte paralajmëruar atë.
Ndërsa organi i tij jozyrtar, “Koha Jonë”, prej dy ditësh shkruan se Meta u tall nga Qeveria për paralajmërimin e tij, dhe sipas saj, atij i duhet t’i kërkohet falje që nuk e dëgjuan.
Ja çfarë shkruan Nikoll Le(h)si në Kohën që i ka ikur koha dhe vlenë vetëm për WC e LSI në këto ditë të vështira për vendin:
“Presidenti i Shqipërisë, Ilir Meta, që në muajin korrik të këtij viti, përmes një letre zyrtare kishte paralajmëruar kryeministrin e Edi Rama, ministrin e Punëve të Brendshme, Sandër Lleshaj dhe ministren e Mbrojtejs, Olta Xhaçka, për rrezikun që një tërmet shkatërrues do të godiste Shqipërinë.
Këtë letër, kreu i shtetit, e kishte shkruar i shqetësuar nga paralajmërimet që kishte dhënë sizmologu grek, Akis Tselentis, drejtor i Institutit Gjeodinamik Obsarvatori Kombëtar i Athinës.
Tselentis kishte paralajmëruar një tërmet apokaliptik që pritej ta godiste Ballkanin, e që do të ishte 30 herë më i fuqishëm se ai që kishte goditur Athinën.
Megjithatë atë kohë mediat pro Edi Ramës dhe ministrat e qeverisë ishin tallur me këtë paralajmërim të presidentit, mbase edhe për shkak të raporteve të ftohura si pasojë e përplasjeve në mes të Partisë Socialiste dhe LSI-së e cila kishte bërë koalicion me PD-në e Lulzim Bashës.
Gazeta “Shqiptarja”, kishte nxjerrë letrën për publikun duke e cilësuar si një gafë dhe çmenduri të Ilir Metës.
“Gafa e rëndë, çmendet Meta, lëshon alarmin, tërmet apokaliptik në Shqipëri”, ishte titulli i kësaj gazete.
Ndërkohë me paralajmërimin e Ilir Metës ishte tallur keq edhe ministrja për Marrëdhënie me Parlamentin, Elisa Spiropali, në një reagim në llogarinë e saj në ‘tëitter’, vetëm dy ditë pas.
“Baba Xhike të kemi rixha, nxirr një dekret e shtyjë atë tërmet se na le pa gjumë. Kjo ishte batuta më e bukur e rrjetit për parashikuesin e parë në botë të tërmetit”, kishte shkruar Spiropali më 29 korrik të vitit 2019.
Megjithatë, vetëm afër 4 muaj më pas, në orët e para të mëngjesit të 26 nëntorit, një tërmet 6.4 ballësh ka shkundur zonat në afërsi të bregdetit, Durrësin e Thumanën.
Si pasojë vdekjen e gjetën 50 persona, mbi 40 u nxorën nga gërmadhat e ndërtesave të rrënuara si pasojë e lëkundjeve”
